Sorkarin chîmralnaah min hnûk lut - Duhoma Mizoram mamawh ber sorkar ṭha - MPC President

Zoram Peoples’ Movement (ZPM) chuan nimin khan Treasury Square-a an pisaah Members Joint Session an nei. Thu sawitu, ZNP president Lalduhoma chuan, Mizoram sorkarin kum khat chhungin Chakma khua 14 a pawm tih sawiin, "Kan sorkar hi Mizo hnam humhalhtu ni loin, chîmralnaa hnûk luttu a ni zawk," a ti. MPC president Lalhmangaiha Sailo chuan, Mizoram mamawh ber chu sorkar ṭha din a nih thu a sawi.

ZNP President chuan, political party dangte chu Chakma chung­changah an khâ a chih tlat tawh nia sawiin, "Chakma chungchang huaisen taka au chhuak thei awm chhun kan ni a, kei ni lo chu kan hnam thilah hma la tur an awm lo," a ti. Chakma foreigner chungchangah ṭan rual a ngaih thu sawiin, "Hnam movement anga kalpui a ngai," a ti.

Mizoram sorkarin foreigner hnawhchhuah theihna leh electoral roll aṭanga paih theihna nei mah se, Chakma foreigner-te hnawtchhuak duh leh thei sorkar an awm lo nia sawiin Duhoma chuan, "Brig. T Sailo sorkar chiah kha hnawt chhuak thei awm chhun a ni a, kum 1982 khan Chakma foreigner 4,572 an hnawt chhuak," a ti. Kum 1982-ah vek MNF-in Chakma chungchangah hma la tawh lo tura an hriattir avangin hmalak zui a ni lo tih a sawi.

Lalduhoma chuan, Mizorama sorkar ding tawhte'n Chakma vote an ît avangin an vulh lian zel nia sawiin, "Electoral roll-ah an thun a, MLA-ah an siam a, minister-ah an dah a, UT an phut ngam ta hial a ni. Congress sorkarin Chakma ten UT an dilna Central-ah a forward sak a ni," a ti a; UT dilna ngaihtuah turin Rajya Sabha-in Committee on Petition a din a, UT dilna chu ûm zuiin Mizoram pawh an rawn tlawh tih sawiin, "Chumi duh lo chuan November 12, 1997-ah Aizawlah kawngzawh ropui tak huaihawt a ni," a ti.

ZNP President chuan, MZP-in kum 1995-ah Chakma chhiarpui an neihah Mizoram mi dik tak Chakma 2,104 chauh an awm tih an hmuh chhuah thu te, Chakma foreigner-te ûm chhuak turin a khát tawkin Central-in Mizoram sorkar a rawn hriattir reng thu leh August 8, 2017-ah pawh Home Ministry-in Chief Secretary lehkha an rawn thawn thu te; Central-in a nawr ngai zawka Mizoram sorkar a awm chu thil zahthlak a nih thute a sawi bawk.

MPC President chuan, Mizoram mamawh ber chu sorkar ṭha din a nih thu sawiin, "Zoram mipuiin sorkar ṭha a din hun nghakhlel takin an thlir a, mipui beisei - kalphung thar, mipuite sorkar din ngei turin ZPM chuan hma kan la mek a ni," a ti a; tunah chuan Mizoram mipuite'n lungawi taka hrawn tur sorkar ṭha an la hmuh loh thu a sawi.

Lalhmangaiha Sailo chuan, sorkar ṭha nei turin corruption do a ngai tih sawiin, "Corruption hi thuneihna hmanga mi fihlimin a do ngam phawt chuan do hneh theih a ni. Mizorama sorkar hnathawk tam zawk hian corruption an kham tawh a, dik taka thawh an duh tawh. Corruption-a fihlim, huaisen taka do ngam entawn tur leh zui tur an awm phawt chuan dik taka hna thawh duh an tam zawk a ni," a ti.

ZPM hmalakna report petu K Sapdanga, general secretary chuan, October 12-ah Lungleiah leh October 16-ah Serchhipah ZPM din a nih thu a sawi a, "Aizawlah ZPM Steering Commitee din chhoh mek a ni a, tunah hian Aizawl veng hrang hrangah October Operation neih mek a ni," a ti.

K Sapdanga chuan, kum 2018 inthlan turah an khingpui turte'n sum hmatheh hle an tum tih sawiin, "Zahpui ahnehin an uanpui zawk," a ti.

Congress party-in sorkar sum hmanga vote lei dan an siam chu NEDP an vuah thu sawiin, "Contract hna lian zawng zawnga hlep aṭanga an lo dawn ve zelte nen belh khawmin, vote leina tur sum an ngah viau. Mipui min tirethei sauh sauh a, 'In retheih em kha i vote kha hralh mai rawh,' min ti leh si a ni," a ti.

MNF party pawhin vote lei chu tlin dan awlsam berah an ngai nghet hle tih sawiin ZPM General Secretary chuan, "A báin vote lei dan tur an ruahman a, a hmingah SEDP an vuah," a ti.

BJP pawhin MLA panga tal lei tlin dan an ruahman tih sawiin, "Sum hmanga Kristian mipui thinlung rawn lei a tum a nih chuan, Narendra Modi hian kan biak Pathian a cho tihna a ni," a ti a; ZPM chuan mipui vote dil nan BJP system aiin MPF system an thlan thu a sawi.