YMA member-te a him china pawr ngawt lo a, A saseha che ngam turin President-in a chah

Champhai Zotlanga YMA General Conference chu October 19, Ningani zan khan a ṭiak a; a tawp zana vantlang inkhawmah Central YMA president Lalbiakzuala chuan, ram dang aṭanga Mizorama dan loa lut Chakma-te chungchangah a him chin aṭanga pâwr taka insehruh ringawt loin, a saseh takah hap a ngai tawh tih a sawi.

CYMA President chuan, Mizoram chhim lam leh khawtlang lamah nasa takin Chakma-te an pung tih sawiin, "Tute emaw ngaihtuah chian loh vangin kum 46 liam ta khan mikhualte tan Chakma Autonomous District Council (CADC) a piang nawlh a, tun thlengin kan buai phah ta a ni," a ti.

Mizote tan khawtualah, a him chin aṭanga pâwr viau ringawt lo a, a saseh lai taka hap chat a ṭul tawh thu sawiin, "CYMA-in fím takin ruahmanna a siam ang a, hma kan la ang. Bangladesh aṭanga dan loa lo lutte hi duat an ṭul lo a, min tibuaitu, mikhual cham reite an ni," a ti.

Bru-te chungchangah Lalbiakzuala chuan, Bru, Mizoram electoral roll 1995-a hming chuang leh an thlahte chu Mizoramah let tura auh an nih reng laiin, mi pamham leh duhâm ṭhenkhatte vangin an lêt duh loh thu a sawi a, "Lo kîr duh lo na nâ nâ chu lo kîr lo rawh se. He tam hian kan mamawh lo, kan ti a ni," a ti a; Bru chungchang chu politics-a hamṭhatna atana hmang lo tur leh an vote tel loa ram kal siam turin political party leh politician-te a ngen.

YMA thupui 'Ṭanpui ngaite ṭanpui' tih chu YMA member-te'n an vawn nun reng a ṭul thu sawiin CYMA President chuan, YMA chu chanhai riangvaite puitu, lusûnte hnemtu a nih zel theih nana ṭan la turin YMA member-te a chah a, "Mite'n YMA hi pawl hlauhawm leh ṭihbaiawm ni lo, mahni inphat a, mi dangte tana thawktu pawl a nihzia an hriat zel theih nan hmalak a pawimawh hle," a ti.

YMA chu Kristianna vawng himtu leh humhalhtu a nih a ngai tih sawiin, "Kristianna hmachhuanin kan kal zel ang a, Kristiannaa innghat pawl kan ni zel ang," a ti a; Yogo pawh Hindu sakhua nena inzawm a nih avangin YMA-in an duh loh thu leh bawng talh khap an duh loh thu Mizoram Governor hnenah an hriattir thu a sawi.

Central YMA President chuan, ruihhlo vangin Mizo ṭhalai tam tak an thi tawh a, an la thi mek zel tih sawiin, "YMA leh ruihhlo hi sawi rem chi a ni lo a, zu vanga kan buainate hi hmuh kân chi a ni lo a, zu hi YMA tan sawi mawi chi a ni lo," a ti a; YMA-in ruihhlo do kawngah nasa zawka ṭan a lak zel dawn thu a sawi a ni.

Lalbiakzuala chuan, YMA chu politics rawng kai lo, tlawmngai pawl a ni tih Mizo mipuiin an hriat thar fo a ngaih thu sawiin, YMA member-te chu political party-ah awmna an nei a nih pawhin, YMA huang chhungah party politics la lut lo turin a chah a; "Eng political party mah kan inthuhnuaitir tur a ni lo. Ram ṭhatna tur a nih chuan political party-te nen pawh inlungrual takin kan thawkho zel ang," a ti. Political party-te chu party rilru pu chunga YMA chhungkuaa inrawlh lo turin a chah bawk.