Zirlaite'n social media leh internet An hman thiam a ngai - H Rohluna

Aizawl West College chuan nimin khan Electric Veng YMA Hall-ah College Week khârna hun an hmang a; khuallian, School Education minister H Rohluna chuan, zirlaite'n social media leh internet hman dan tâwk an thiam a ngaih thu a sawi.

School Education Minister chuan, hmasawnnain a ken tel internet leh social media-te chu a tâwk chauha hmang ṭhinte tan thil ṭangkai tak a nih laiin, hmang thiam lo tan chuan mahni nih theih ve tur ni phâk loa mihring siamtu a ni thei tih a sawi a, "Social media leh internet-te a tâwk chin chauha hman dan hriat a pawimawh," a ti.

Tunlaiah zirna leh hna zawnnaah inelna a sang tawh tih sawiin Rohluna chuan, "Mizo zingah all India service-a tling an tlem tawh hle a, tuna zirlai ni mek, hun ṭha la neite'n chutiang lamah chuan an ngaihtuahna an dah ka duh hle," a ti a; mi dang tih theih chu an ti ve thei a ni tih hre turin zirlaite a chah.

H Rohluna chuan, sorkarin zirna tihhmasawn a ngaih pawimawh thu sawiin, "Kawng hrang hrangin hma a la a, elementary lamah a ni emaw, zirna sang lamah a ni emaw, hmasawnna ruhrel ṭha tak siam chhoh mek a ni. Hmunhma ṭha leh changtlung zawk siam a nih rual hian, result ṭha zawk leh thiamna hman tlak a thlen phah tur a ni," a ti.

Aizawl West College-ah hian zirlai 862, teaching staff 36 leh non-teaching staff 15 an awm mek a ni.