KHAWTHLIR

Masihi Sangati Convention tan
Hnam dang Kristiante inkhawmpui, Masihi Sangati Convention vawi 30-na chu nizan khan Khatla Presbyterian Kohhran biak-inah ṭan a ni a, Pathianni zanah a ṭiak ang. Inkhawmpuiah hian thupui chu 'Kristian nun' tih a ni a, speaker chu Rev. Lalfakawma Chhangte a ni. Inkhawmpuiah hian Mizoram hmun hrang hranga hnam dang Kristian ṭhahnem tak an tel.

MHIP lawm
MHIP general headquarters chuan thuchhuah siamin, Zohmangaihi thattu, a pasal Lalremruata Ralte s/o Lalchunglura, Zarkawt chu Court-in dam chhunga táng tur leh pawisa chawi tura a ti chu lawmawm an tih thu an tarlang a; Zohmangaihi ruang senghawinaa puitu Lalremruata unaupa Lalthlamuanpuia pawh kum thum táng tur leh pawisa chawi tura tih a nih avangin an lawm thu an sawi bawk.

Lay leader training
October 16 aṭanga nimin thleng khan Synod Multipurpose Training Centre-ah Synod Lay Leaders' Training vawi 199-na neih a ni a, presbytery 12 aṭangin kohhran upa 44 an tel.

Pangang khawi zir
Lawngtlai District Sericulture Office leh Research Extension Centre, Central Silk Board, Aizawl bultumin nimin khan Lawngtlai Press Club-ah 'Pangang Khawitute Ni' hman a ni a, pangang khawitute tan skill upgradation training buatsaih nghal a ni.

Kal khap
Lunglei SP chuan thupek chhuahin, World Bank Road, Pukpui leh Haulawng inkar kawngah zing dar 7 aṭanga zan 6 thleng lirthei tlan khap a nih thu a puang a, "407 truck leh a chung lam chu Hnahthial kawng lamah kal vek tur a ni a, maxicab chin hnuai lam Aizawl aṭanga rawn kal leh Lunglei-Aizawl tlante chu Haulawng-Dawn kawngah tlan vek tur a ni," a ti. Thupek hian dan leh thupek kengkawhtute leh kawng siamtute a huam lo.