Covid-19 vei hmuh tawh zat 361 Hripui veite - civil mi 205, sipai 156
July 24, Zirtawpni khan Aizawl district leh Kolasib district-ah Covid-19 hripui vei mi 29 hmuh chhuah belh a ni a, Mizorama hripui vei hmuh tawh zat chu mi 361 an tling tawh. Mizoram aṭanga swab sample endik tawh zat chu 19,781 a ni. Hetih lai hian, nimin khan Covid-19 vei dam tawh mi 10 chu chhuahtir an ni.
July 24 khan ZMC Covid-19 Laboratory-ah mipa 179 leh hmeichhia 59-te swab sample endik a ni a, Covid-19 vei mi 28 hmuh chhuah a ni. Endikte hi ZMC-a thawk mi 41 te, Aizawl aṭanga an dawn 132 leh Mamit aṭanga an dawn 18 te, Assam lam mi 44 leh Haryana mi pathumte an ni.Kolasib-a Rapid Antigen Test hmanga July 24-a sample 157 (mipa 152 leh hmeichhia panga) endiknaah Counter Insurgency and Jungle Warfare School (CIJWS), Vairengte hnuaia Lailapur quarantine centre-a awm mek sipai pakhatin hripui a vei tih hmuh chhuah a ni bawk.
Zirtawpnia ZMC-a Covid-19 vei thar 28-te chu Border Security Force (BSF) sipai, mipa vek niin, kum 25-52 inkar an ni a; state pawn aṭanga tun hnaia Mizorama rawn lut, quarantine facility-a awm lai vek an nih thu sorkar thuchhuah chuan a tarlang. CIJWS sipai pakhat, hripui vei hmuh chhuah thar chu kum 29 mi a ni a, Lailapur quarantine facility-a awm mek a nih avangin Masimpur, Silchar-a sipai damdawi-inah dah luh nghal a ni.
Hetih lai hian, nimin khan Aizawla Covid-19 vei enkawl mek mi 10 - Zokhawsanga Assam Rifles mi pariat leh Lungverha NDRF mi pahnihte chu Covid Care Centre (CCC), Berawtlang aṭangin chhuahtir an ni a; Berawtlanga CCC-ah hian hripui vei mi 29 an la awm mek.
Sorkar thuchhuak tawhte aṭanga a lan danin, Mizorama Covid-19 vei tawh zawng zawng zinga mi 201 chuan an vei tawh lo (negative tawh) a, 55.68% a tling. Mi 160-in vei mekin, chu chu 44.32% a ni a; fihlim tawh mi 201 zinga 193 chhuak tawhin, mi pariat chhuahtir an la ni lo thung.