YMA sub-hqrs din belh tum

Central YMA-in district thar pathuma YMA sub-headquarters din dan tur zir chiang tura study group a dinte chuan July 25, Inrinni khan Hnahthial an tlawh a, district chhunga group YMA hruaitute nen an inkâwm.

Study group convener Prof. Lalnuntluanga, CYMA general secretary chuan, CYMA-in district thar pathum - Hnahthial, Saitual leh Khawzawlah YMA sub-headquarters hawn a remti tawh tih sawiin, "Tum danah chuan kumin YMA Day hma khan din vek tum a ni. Mahse, hripui léng vangin duh angin hmalak chak theih a ni lo. District tharte kan tlawh chhuak vek tawh a, CEC-ah report pharh a ni. Hripui dinhmun azirin August thla velah chuan sub-headquarters hawn theih beisei a ni,"a  ti.

Hetih lai hian, tun hnaia Saitual Group YMA Executive Committee ṭhukhawm chuan, YMA Sub-Headquarters, Saitual din a nih dawn tak avangin, Saitual Group YMA chu an ṭhiat. Saitual hi CYMA study group chuan an lo enfiah tawh a ni.