Tun thlaah Tlawva SHP siam zawh beisei

Khuangthing leh Thekpui inkara Tlawva lui aṭanga kawlphetha siamna tur, Tlawva Small Hydel Project (SHP) chu tun thla chhungin hman theiha peih tum a ni a, tui tam laiin kawlphetha megawatt 5 pe chhuak thei tura ngaih a ni.

Tlawva SHP enkawltu Power & Electricity executive engineer R Lalrin­kima sawi danin, contract amount chu cheng nuai 5,670 a ni a, approve estimate chu nuai 7,340 a ni thung. A siam hna chu Nortech Power Project, Kolkata-in an thawk a, hna thawh zawh hun tura tihah an zawh theih loh avangin ṭum eng emaw zat hun pawhseisak an ni tawh.

Project-ah hian kawl­phetha kilowatt 2,500 (megawatt 2.50) pe chhuak thei kháwl pahnih bun a ni a, ruahtui tlâk tam lai, May-October inkarah chuan megawatt 5 (kilowatt 5,000) pe chhuak theia ngaih niin, November-February chhung erawh chuan megawatt 1 siam chhuak thei tura ngaih a ni. Kum khatah kawlphetha million unit 13.47 pe chhuak tura ngaih a ni a, chuta ṭang chuan kum tin cheng nuai 491.66 hmuh lêt beiseiin, kum 15 hnuah a siamna man hmuh lêt beisei a ni.

Tlawva SHP atana original estimate cheng nuai 5,749.08 aṭangin contractor Nortech Power Project hnenah 'Turn-Key Contract' (contractor hnenah sum an pe tawp a, contractor-in a thawh zawhah sorkarah an hlan ang) hmangin nuai 5,670 hmanga siam turin pek a ni a; a tìra ruahmanna tihdanglam a ngaih vang te, tuikawng siam turah leimin nasa tak a awm avang leh hmun danga sawn a ngaih avangin revised estimate nuai 7,340 siam a ni.

(Phek 2-ah zawm a ni)