Sorkarna kan chang a nih chuan Kan danglam dawn - ZPM President

Zoram Peoples' Movement (ZPM) president Lalliansawta chuan nimin khan Aizawl Press Club-ah thuthar thehdarhtute a kâwm a; Pathian leh mipui zarah ZPM an sorkar a nih chuan an danglam tur thu a sawi.

ZPM President chuan, ZPM sorkar ruangám tur hmun hrang hrangah an hruaitute'n an tlangaupui mek tih sawiin, "Hruaitu kan invuah dan - leader, president, working president bakah, Val Upa Council-te kan ti a, sawi pawh a hlawh hle. Hruaitu báwr invuah danah hian buaina kan nei lo a, a remchangin a ṭha hle a ni tih a hmangtute chuan kan hria. Kan chhawr ṭangkai hle a ni," a ti.

Ram kalsiam thlir ngun poh leh rilru a thawpik ṭhin chu fel lo an tih thu sawiin Lalliansawta chuan, "Mizo Kristian kan nih chhung chuan ram mipui beiseina nung siamsak turin tih theih kan nei a, kan tih duh leh duh lohah a innghat," a ti a; sorkar chu thilthlàwnpek semtu a ni lo a, ram hmasawnna tluantling duanga hma latu tur a nih thu a sawi.

Lalliansawta chuan, sorkar dik tak chu ropui taka chung­nung lurh ni loin, mi rethei ber leh mâwlmang ber kaih­kuah phak a ni tih sawiin, "Sor­karah lal ṭhutthleng a awm lo a, hnathawh kawr leh mipui rawngbawlna hmanrua a awm," a ti a; sorkar ruangámte chu sorkar mek leh sorkarna tawh­teah an hmu em tih inzawt fo turin mipui a chah.

ZPM party-in sum leh pai leh thiamna sang bik chhuan tur an nei lo tih sawiin Sawta chuan, "Thawhrimna nena kan chi tuh rahte kan ramin a la seng ngei beiseiin, lawmman leh mahni ropuina tur zawng loin, kan ram tan thil ropui tak tih tumna rilru kan pu a ni," a ti a; inpekna thinlung nen ram mipui tan hlawhtlin châka tuihâlin, hna thawk turin rilru an siam thu a sawi.

ZPM President sawi danin, an party chuan October 2022 aṭangin Vangpui Fehchhuah an kalpui dawn a, a thawh khatnaah district panga - Mamit, Kolasib, Saitual, Khawzawl leh Champhai district tlawh an tum. District pangaah hian khaw 218 tlawh an tum a, hlawm 39-ah inṭhenin, mi 170 tel turin an inruat.

Vangpui Fehchhuah chu campaign dan tlángláwn anga kalpui loin, khaw tina ZPM dinhmun bakah, khaw 218-te harsatna leh mamawhte an zir chiang dawn a ni.