PUC NSS-in golden jubilee an lâwm

Pachhunga University College (PUC) National Service Scheme (NSS) unit chuan nimin khan PUC Seminar Hall-ah an kum 50-na, golden jubilee an lawm a, Rajya Sabha MP K Vanlalvena'n hmanpuiin, jubilee hriatrengna lungphun a hawng.

MP K Vanlalvena chuan, amah pawh PUC-a lehkha zir ṭhin a nih thu sawiin, PUC chu Mizorama college ding hmasa ber leh NSS din hmasakna ber a nih thu sawiin, NSS hmalakna avangin PUC campus-in ram ngaw ṭha tak a neih thu a sawi a,"PUC campus a hrin dup theihna atan hian NSS-te'n hma an la nasa a, tunah chuan Aizawl tinuamtu a ni tawh," a ti.

Khualzahawm Dr Zirlianngura, state NSS officer pawhin thu sawiin, PUC NSS golden jubilee lawmpuina a hlân a, "Mizoramah chuan PUC-ah NSS bul ṭan a ni a, engkimah PUC hi bul ṭantu a ni zel a, hun lo la kal leh zel turah pawh hmahruaitu leh bul ṭantu in nih zel ka beisei," a ti a; Mizorama NSS programme officer pasarih leh NSS volunteer pakhatin NSS national award an dawn tawh thu a sawi.

PUC principal Dr H Lalthanzara tarlan danin, PUC-ah hian under graduate course 23 leh post graduate course panga a awm mek a; under graduate-ah zirlai 2,817, post graduate-ah zirlai 100 leh Ph.D ti mek mi 60 vel an awm. Thawktu faculty 144 leh non-teaching staff 94 an awm mek bawk.

PUC NSS golden jubilee lawmna inkhawm hi NSS programme officer Dr K Vanlaldinpuia'n a kaihruai a, PUC aṭanga NSS PO zinga national award dawng tawh pahnih - Dr Lalthankungi leh Dr Zoramdinthara te pawhin thu an sawi. MLA Dr Vanlalthlana, Association for Voluntary Blood Donation leh Mizoram Journalists' Association hruaitute'n an hmanpui a ni.

NSS golden jubilee lawmna pual hian essay inziahsiak, poetry inphuahsiak leh lem inziahsiak an buatsaih a, a ti ṭhate hnenah lawmman an sem. PUC NSS hian an golden jubilee lawmna pualin thisen unit 421 an pe tawh bawk.