Governor-in sorkar hmalakna a enfiah

Ni hnih cháma Saitual district tlawhtu Governor Hari Babu Kambhampati chuan nimin khan Ṭamdil Wetland-a Environment, Forest & Climate Change, Tourism leh Fisheries department-te hmalakna a enfiah. Saitual leh Keifanga PMAY(U), PMUY leh MNREGA hnuaia ṭanpuina dawngtute a tlawh bawk.

Governor chuan, Ṭamdil chhehvela ramngawte humhalh a pawimawh thu a sawi a; Ṭamdil Forest Rest House hung chhungah Mizoram state tree - Herhse ṭiak a phun nghal a ni.

Hari Babu Kambhampati chuan, Ṭamdila Tourism department-in mikhual thlen theihna in tê (cottage) pasarih an siam chu khualzinmite hriatah pho lan uar a pawimawh thu a sawi a; Tourism department-in Mizoram hmun hrang hranga hmuhma ṭha tak tak an neihte chu khualzinte hîp thei atana chhuanawm tak tak a nih thu leh tlangzarh thiam a ṭul thu a sawi bawk.

Fisheries department-in Ṭamdil Fish Hatchery an siam Governor-in a tlawhnaah Fisheries hotute chuan, Saitual district-ah sangha khawi theihna tur hmun rem zau tâwk tak a awm thu an lo hrilh.

Governor hi Saitual district bawrhsap VL Hruaizela Khiangte, SP J Lalmuankima leh sorkar hotu dangte'n an ṭawiawm a ni.

Governor Hari Babu Kambhampati hian nimin vêk khan Saitual leh Keifanga PMAY(U), PMUY leh MNREGA hnuaia ṭanpuina dawngtute a tlawh a, scheme aṭanga ṭanpuina an dawn chungchanga an ngaihdante a zâwt.

Dr Hari Babu Kambhampati chuan, sorkar laipui scheme-te beneficiary-te'n a hun taka an dawn a, ṭangkai taka an hman theih nan ṭan la zual turin sorkar hotute a chah a ni.