Deputy CM-in Vângpui Kût a hmanpui

Chalráng khuain an community hall-a Vângpui Kût an hman mek chu nimin khan deputy chief minister Tawnluia'n a hmanpui. Minister chuan, sikul zawng zawngah subject pakhatah hnam làm neih theih ni se a duh thu a sawi.

Tawnluia chuan, Mizote'n Chapchar Kût, Mím Kût, Páwl Kût leh Vângpui Kût an hmang ṭhin tih sawiin, "Kût hi Kristianna lo luh hma, tun hma chuan uar takin kan hmang ṭhin a, Kristianna a lo luh hnuah kan hman ṭhin dan anga hman a rem ta lo a, tun hnuah zu leh ruihhlo tel loin uar taka kan han hmang thar leh ta hi a lawmawm," a ti.

Hnam làm chi hrang hrang chu a titute'n lemchang anga tih a awl thu sawiin Tawnluia chuan, "Kan hnam làmte hi kan ta, kan làm dan a ni a, lemchang ni loin a titute'n tih tak zet zeta kan tih a ngai," a ti bawk.