Anthurium Festival ṭan a ni

Nimin khan Reiek Tourist Resort-ah Anthurium Festival hman ṭan a ni a, Tourism minister Robert Romawia Royte-in a hawng. Minister chuan, Tourism department-in mipui mak tih khawpin hmasawnna a neih zel dawn thu a sawi.

Robert Romawia Royte chuan, Tourism department-in hma-chhawp tam tak a neih thu sawiin, "Mipui mak tih khawpin hmasawnna a nei zel dawn. Tourism hi department ta bik a ni lo a, a hlawhtlinna atan sorkar department hrang hrang, mipui leh NGO-te thawhhona leh inlungrualna a ngai. Tourism hian mipui hlimna kan ngai pawimawh ber a, Mizo mipui hi hlim em em turin kan duh," a ti.

Anthurium Festival hawnna inkhawm hi Tourism secretary Manisha Saxena-i'n a kaihruai a; Tourism Development Board vice chairman TC Pachhunga leh sorkar laipuia Ministry of Micro, Small & Medium Enterprises secretary BB Swain te chu khualzahawm an ni.

Anthurium Festival-ah hian hnam làm, zai, fashion show leh intihlimna chi hrang hrang buatsaih a ni a, vawiinah chhunzawma khàr a ni ang. Tourism department chuan, Anthurium Festival-a tel vek turin mipui an sáwm a ni.