Electric current-in mi 3 a man hlum

Lawngtlai district-a Rúlkual khuaah nimin chhûn khan electric current man vangin mi pathum an thi a, mi pahnih na takin an hliam.

The Lawngtlai Post editor Lalngheta Ralte hnen aṭanga Vanglaini thu dawn danin, October 12, 2022 khan Rulkual aṭanga km. 4 vela hlaah thing a tlu a, electric hrui a vaw chat. Electric hrui chhiatna chu ramhnuai, khawih harsa lai deuh a nih avangin Power & Electricity department-in khawtlang punin nimin khan electric line chhia an siam a ni.

Electric hrui chhia an siam mek lai hian current a kal thut a, chu chuan hrui siama hna thawk mekte a man a ni. A hmunah mi pathum - Samuel Lalthianghlima, Lalramdinpuia leh Lalrinchhana te an thi a; Lalrinenga leh Lalnghawrliana te pawh na taka hliamin, Lawngtlai District Hospital-ah enkawl tura hruai nghal an ni.

Rulkuala electric hrui hi Bungtlang South pekna electric hrui nena kal kawp a ni a, Bungtlang South line chu a ṭha niin an sawi. Electric line siam a nih lai hian Rulkual line-ah current a awm lo a, Bungtlang South line lamah current a kal thung a, khawi lai emawah line pahnihte chu a intawk a nih rin a ni.