LMC electoral roll tlangzarh a ni; Lungleiah vote nei 40,541 an awm

Lunglei Municipal Council (LMC) inthlana hman tur electoral roll chu nimin khan Lunglei DC conference hall-ah district election officer (DEO) Kulothungan A, bawrhsapin a tlangzarh. LMC huam chhunga veng 23-ah voter 40,541 an awm a, draft roll-a voter 40,265 aiin 276 (0.68%)-in an tam zawk.

LMC electoral roll tharah hian voter 40,541 zinga 19,117 (47.15%) chu mipa niin, voter 21,424 (52.84%) chu hmeichhia an ni a; hmeichhia 2,307-in an tam zawk.

Ward no. 8 - Ramthar Veng leh Farm Vengah voter tam berin, 4,306 an awm a; Ward no. 11 - Lungpuizawl, Zobawk North leh Zobawk South-ah voter tlem berin, 2,975 an awm.

DEO Kulothungan A chuan, a hun taka LMC final electoral roll peih a ni chu lawmawm a tih thu sawiin, thawktute leh YMA, political party, media leh khawtlang hruaitute chungah lawmthu a sawi.

Electoral roll tlangzarhna inkhawmah hian election leh a kaihhnawih buaipuitu officer-te bakah, political party hrang hrang aiawh te leh Lunglei YMA sub-headquarters YMA hruaitute an tel a ni.