Sorkar sikulah mipuiin rinna an nghat - Education Minister

Chaltlang High School chuan nimin khan an sikul tualah golden jubilee an lawm a, School Education minister Lalchhandama Ralte-in a hmanpui. Sorkar sikulah mipuiin rinna an nghat a, zirlai inziak lut a sîng télin an pung niin a sawi.

Chaltlang HS hi kum 1972-ah din a ni a, kum 1973-ah adhoc grant in aid-ah hlan kai a ni. Kum 1981-ah deficit-ah dah a ni a, kum 1991-ah sorkarin a la. Tun dinhmunah zirlai 290 leh zirtirtu 17 an awm.

Education Minister chuan, sorkar enkawl zirna-inah mipuiin rinna an nghat zel nia sawiin, "Enrolment a sing télin a pung chho. Tam lama hmasawnna rualin, quality education neih theih nan khawtlang hruaitu te, kohhran leh tlawmngai pawlte ṭanho ṭhat a pawimawh," a ti a, sorkar finchhuaha thuràwn pe fo turin a sáwm.

Lalchhandama Ralte chuan, zirtirtu 2,500 chuang an lak tawh thu leh MPSC kaltlangin thawktu nghet, zirtirtu, headmaster leh CEO-te lak mek a nih thu a sawi bawk.