Mizoramah Covid-19 kai hmuh belh awm lo mah se Thlamuan hun a la ni lo - IMA President
Indian Medical Association (IMA) Mizoram State Branch president Dr Rosangluaia chuan, Mizoramah Covid-19 kai hmuh chhuah belh awm lo mah se, mipui tan thlamuan hun a la nih loh thu a sawi.
Vanglaini palai zawhna chhangin Dr Rosangluaia chuan, Mizoramah Covid-19 kai hmuh chhuah ni rih lo mah se, state dang aṭanga rawn haw an awm reng avangin fimkhur reng a ṭul thu a sawi a, "Mizoramah hian Covid-19 kai leh kai loh 100% finfiah theih a ni lo. Symptom pawh nei miah loa kai awm theih a ni a, kan kai darh vak ang tih a hlauhawm. Mipui i fimkhur deuh deuh ang u," a ti.
IMA President chuan, mipuite'n thla 3-4 hnu vela nunphung pangngaia nung thei chauh turin an rilru siam se medical lam chuan an duh thu sawiin, "Tun dinhmunah chuan mask chu kan hmang ṭha viau a, a hmang lo man uar ni se. Social distancing erawh kan zâwm ṭha lo hle a, dâwr leh damdawi-inahte kan innék tual tual reng a ni," a ti a; hmai tuamna leh social distancing zâwm lo vil tur bik din ni se an duh thu a sawi.
Inkhung hran (quarantine) chungchanga zawhna chhangin Dr Rosangluaia chuan, "Medical lam chuan room khatah pakhat zel awm thei se kan duh. Mahse, sorkar tan tih theih a ni lo ang. A tlem thei ang ber room pakhata dah theih ni se, toilet pawh a tlem thei ang berin inhman ṭâwm se kan duh. Covid-19 hluar zualna state aṭanga rawn hawte phei chu a hran deuha dah theih ni se a duhawm hle," a ti.
IMA President chuan, state hrang hrang aṭanga Mizote an rawn haw kim hnua thla 3-4 vel Covid-19 kai hmuh chhuah thar a nih loh hnuah chauh lo chuan Covid-19 laka fihlima inngaih chi a nih loh thu a sawi bawk.