KHAWTHLIR
Sangati khawmpui
Mizoram Presbyterian Kohhrana Masihi Sangati inkhawmpui lian, Masihi Sangati Convention vawi 32-na chu nizan khan Durtlang Kohhran biak-inah ṭan a ni a, October 16, Pathianni zanah a ṭiak ang. Inkhawmpui thupui chu 'Tho la, êng rawh' tih a ni a, speaker tur chu Rev. PC Rohlira a ni. Nizan khan palai lawmna inkhawm neih a ni a, Synod moderator Rev.Dr Vanlalnghaka Ralte-in thuchah a sawi a; Pathianni chawhnuah Lalpa zanriah sakramen ṭheh a ni ang.
Thisen pe
Aizawla Catholic Ṭhalai Pawlte chuan Ṭhalaite Ni pualin nimin khan St. Lawrence Hall, Ramthar Vengah thisen pek an huaihawt a, Civil Hospital, Aizawl tan thisen unit 69 an pe a, petute mipa 56 leh hmeichhia 13 an ni.
Treasury hawng
Minister Dr R Lalthangliana chuan nimin khan a bial chhung Hnahthial Bazar Venga sorkar Treasury Office a hawng. Minister chuan, rei lo têah Hnahthialah Fishery office leh Transport office pawh hawn theih a beisei thu leh, DC office thar leh CMO office sak mek chu 2023 kum laihâwlah hawn theih a beisei thu a sawi.
DC-in OSC tlawh
Champhai district bawrhsap James Lalrinchhana chuan nimin khan Champhai Vengsanga One Stop Centre (OSC) a tlawh. OSC Special Campaign 2.0 pualin hun hman a ni a, OSC hmalakna leh hmachhawpte sawiho nghal a ni.
Legal awareness
Mizoram State Legal Services Authority leh Mamit District Legal Services Authority chuan October 13, Ningani khan Mamita Siamliana Hall-ah Legal Awareness Campaign on Menace of Drugs & Eradication of Drugs Abuse an buatsaih a, Gauhati High Court judge Justice Michael Zothankhuma, MSLSA executive chairman-in a hmanpui. Zirhonaah hian sorkar official, khawtlang hruaitu leh zirlaite an tel a ni.
Speaker leh MSS
Assembly speaker Lalrinliana Sailo chuan nimin khan a pisaah Administrative Training Institute-a MSS Foundational Course kal mek mi 23 a kâwm a; MSS-te chu sorkar pisa neitu leh sorkar vênpuitu ber an nih avangin, inkaihhruaina dante hre chiang a, inzir belh ngaihnaah inzir belh zel turin a chah.
SEDP chungchang inzirtirna nei
Khawzawla Sericulture department chuan nimin khan an department kaltlanga SEDP ṭanpuina sum dawngtute pualin Khawzawl Electric Veng YMA Hall-ah training an buatsaih. Training zawhah SEDP first instalment dawng tur mi 63-te bank account-ah Rs 25,000 thun nghal a ni.
DC-in vawk lak luh khap
Lunglei DC Kulothungan A chuan, African Swine Fever avangin Lungei district-ah state dang leh ram dang aṭanga vawk, vawk sa leh vawk sa aṭanga siamte lak luh te, vawk damlo talh leh hralhte khap a nih thu a puang. Vawk damlote dah hran vat tur a nih thu te, vawk thi chu thûk takah phûm tur a nih thu te, vawk damlo, thi leh vawk suat duhte chu AH&Vety hotute hnenah hriattir tur a nih thu a tarlang bawk.