Covid-19 vei mek mi 78 an awm

October 13, Nilaini khan Mizoramah Covid-19 vei mi 24 chiah hmuh chhuah a ni a, nimin khan mi 13 chhuahtir niin, hripui vanga thi an awm belh lo. Nimin tlai khan Covid-19 positive mi 78 an awm.

IDSP aṭanga thu dawn danin, October 13-a Covid-19 positive mi 24 hmuhte chu swab sample 197 endik aṭangin 12.18% a tling a; positive hmuhna district-te chu Khawzawlah mi pasarih, Aizawl, Lunglei leh Saitualah panga ṭheuh leh, Champhai leh Serchhipah pakhat ve ve a ni.

Mizoramah swab sample 19,85,663 endik tawh niin, Covid-19 vei 2,38,661 hmuh chhuah a ni tawh a, 12.02% a ni. Nimin tlai dar 5 thlengin mi 2,37,860 (99.67%) chhuahtir an ni tawh a, mi 723 (0.30%) thi tawhin, enkawl mek mi 78 (0.03%) an awm.

Mizorama district 11 zingah Siaha, Kolasib, Lawngtlai leh Hnahthial district-ahte Covid-19 vei mek an awm tawh rih lo. Heng district-a positive hmuh hnuhnun ber ṭum chu - Lawngtlaiah September 27, Hnahthialah October 3, Siahaah October 6 leh Kolasib-ah October 7 a ni.