Kum 2009-10 - 2016-17 chhungin Mizoramah nausen 4,942 an thi

Tun hnai kum riat, 2009-10 aṭanga 2016-17 chhung khan nausen kum khat hnuai lam thi 4,942 an awm a, nu nau chunga thi 127 an awm. Sorkar kum liam ta, 2016-17 kha nausen kum khat hnuai lam thi zat tlem ber kum a nih laiin, nu nau chunga thi rate san ber kum a ni thung.

State Health Management Information System (HMIS) report-a a lan danin, sorkar kum liam ta, 2016-17 khan nausen kum khat hnuai lam 405 thiin, tun hnai kum riat chhunga nausen thi tlem ber kum a ni a, nausen thi zat chhinchhianna dan, infant mortality rate (IMR) pawh a hniam ber kum niin, IMR chu 21 (nau piang 1,000 zelah 21 an thi tihna) a ni.

Kum riat kal ta chhunga nausen kum khat hnuai lam thi tam ber kum chu 2014-15 kha niin, 822 an thi a, IMR pawh 37 niin, a san ber kum a ni. Kum 2014-15 leh 2013-14 kha IMR-in 30 a pelh kumte a ni a, kum 2015-16 aṭang erawh chuan a hniam zawngin a kal tawh thung.

Kum 2009-10 aṭanga 2016-17 thlengin nu nau chunga thi 127 an awm. Kum riat chhunga raicheha thi tam ber kum chu 2014-15 kha niin, nu 21 an thi a, maternal mortality rate (MMR) erawh a san ber kum a ni lo a, MMR chu 95 (nu 1,00,000 zelah 95 an thi tihna) a ni. MMR san ber kum chu kum liam ta, 2016-17 kha niin, nu 20 an thi a, MMR chu 104 (nu 1,00,000 zelah nu 104 an thi) a ni.

Financial year hnuhnung ber, April 2016 - March 2017 chhung bikah, Mizoram pumah nau piang 19,426 zinga 405 chu kum khat an tlin hmain an thi a, IMR chu 21 a ni. IMR sanna ber district chu Siaha district niin, 28 a ni a, IMR hniamna ber district chu Aizawl East niin, 14 a ni thung. Hetih lai hian, Aizawl West district-ah nausen kum khat hnuai lam thi tam berin, 144 an thi.

Kum 2016-17 chhung vek khan Mizoram pumah nu, nau chunga thi 20 an awm a; maternal mortality rate (MMR) chu 104 (nu 1,00,000 zelah 104 an thi tihna) a ni. MMR sanna ber chu Siaha district niin, 303 a ni a, Serchhip district-ah nu nau chunga thi an awm lo thung.

Kum 2016-17 chhung khan Mizorama health sub-centre leh centre hrang hranga nau pai inziak lut zat chu 21,986 niin, chu'ng zinga 15,384 (70%) chuan damdawi lak tur ang an la kim. Nau piang zat chu 19,426 a ni a, chungte chu damdawi-in leh health centre-a piang 17,379 leh mahni in lama piang 2,047 an ni.

Nau piang 19,426 zinga 2,919 chu zai chhuah an ni a, thi saa piang 175 an awm. Nausen kum khat hnuai lam zingah 17,876-in hri danna an la kim a, chu chu nau piang zat aṭangin 93% a ni. Kum 2016-17 chhung khan nu 1,277 an insiam a, mipa insiam an awm lo. Health sub-centre hrang hrangin condom an pek chhuah zat chu 1,11,699 a ni.