Covid-19 veiin Leitana a tlawhte an fihlîm Futsal khêlte sample niminah lâk a ni

Zoram Medical College (ZMC)-a doctor pakhat, Covid-19 a vei tih July 20, 2020-a hmuh chhuahin hripui a vei tih hriat hmaaa Durtlang Leitan veng chhunga a tlawhpawh (a lênna) mi pathumte chuan Covid-19 an vei rih lo tih an finfiah. July 20 zana Malsawma's Yard-a futsal khel Leitan veng mite chu nimin khan a vawi khat nan an swab sample lâk a ni.

Leitan Local Task Force (LTF) Secretary hnen aṭanga thu dawn danin, ZMC doctor, Covid-19 positive hian a vei tih hriat hma, July 17, 2020-ah Leitana a ṭhiante (chhungkaw pakhat) a tlawh a, chu'ng mite chu July 23, 2020 khan an swab sample lak niin, July 24-ah endik a ni a, hripui an kai lo tih hmuh a ni. Chutih rualin, tun karah an sample endik nawn leh a ni dawn.

July 20 zana Malsawma's Yard-a City Hospital leh Grace Nur­sing Home-a thawkte'n futsal an khelh hnua inkhel Leitan veng mite chu ni nga chhung khung hran an nih hnuah nimin khan an swab sample lak a ni a, vawiinah endik a ni ang.

Leitan LTF Secretary chuan, an veng mi, July 20 zana futsal khelhnaa kal nimina swab sample lâkte chu mi 40 chuang an nih thu a sawi a (nimin tlai dar 4 vel thleng khan la lâk mek a ni), "Kan chhinchhiah chinah chuan mi 46 an ni a, a aia tam pawh an ni mai thei. Hengte hi kan veng mite chauh an ni a, anni bakah hian futsal khelhnaa kal ve Durtlang leh Durtlang North lam mite pawh an awm nual," a ti.

July 20 zana futsal khel zingah Covid-19 vei an awm avang hian Leitan veng mi kal vete chu July 21 aṭangin khung hran nghal vek an ni a, July 21 chhun aṭangin an vengah total lockdown kalpui nghal ni bawkin, vawiina sample test result a chhuah hma chuan an chhunzawm rih dawn a ni.

Hetihlai hian Durtlang Khawthleng (Dur­tlang, Leitan & Durtlang North) Local Task Force chuan July thla tìr lam khan State Level Task Force on Covid-19 Chairman (Chief Secretary) hnenah lehkha thawnin, an huam chhunga BSF Hospital-a an inenkawl dan leh duty dante endik turin an ngen a; ngenna an thlen hnuah sorkar lam aṭangin medical team-in an endik nghal.

Vanglaini palai zawhna chhangin Durtlang LTF chairman RC Lalrinliana chuan, "Durtlangah hian BSF damlote enkawlna hmunpui BSF Hospital a awm a, Durtlang North lamah phei chuan BSF sipai chhungkua eng emaw zat mimal in luahin an awm. Bank, ATM leh bazar thlengin kan inṭâwm lo thei lo," a ti a; medical team-in BSF Hospital an endik hnuah, BSF-te chu an fimkhur thu leh hlauhthâwn tur a awm loh thu an rawn hrilh tih a sawi.