SDA-ah cancer vanga thi 20% an awm

Seventh Day Adventist (SDA) kohhrante chu zûk leh hmuam ti lo tura inzirtir nasa an ni a; SDA member, kum nga chhunga thi zingah cancer vanga thi 20% an awm a, 80% chu natna dang vanga thi an ni. Cancer vanga thi zingah kum upa lam an tam ber.

Mizo Conference of SDA president Pastor Biakthansanga chuan, naupan lai aṭanga SDA kohhrana awm char char zingah cancer natna vanga thi awm ve zauh mah se, an tam lo hle niin a sawi a; zûk leh hmuam an tih loh chhan chu Bible-a an innghah vang niin Vanglaini a hrilh.

SDA hruaitute'n an zir chian danin, kum nga chhunga Mizoram hmun hrang hranga SDA bial 14-a cancer leh natna dang zawng zawng vanga thihna lak khawm a ni a; kum nga chhung­in SDA member mi 210 an thi. Thi mi 210 zinga 42 chu cancer vanga thi an ni a, mi 168 chu natna hrang hrang 32 vanga thi an ni thung.

Seventh Day member, cancer vanga thi 42 zinga mi 30 chu kum 50 chung lam an ni a, a dang 10 chu kum 50 hnuai lam an ni. Cancer vanga kum 50 hnuai lam thi zingah naupang thisen cancer vanga thite an awm ve bawk. Natna dang vanga thih chhan tam zualte chu - awmlái 18, stroke 16, accident 18, pum ná 13, heart attack 13, ashtma 10 leh kal (kidney) ṭha lo 11-te a ni.

Kum nga chhunga SDA bial hrang hranga mitthi zingah, Mamit bialah mitthi pathum awmin, cancer vanga thi an awm lo. Lawng­tlai bialah mitthi 10 awmin, cancer vanga thi an awm lo a; Champhai bialah kum 2012-2016 chhungin mi 24 an thi a, cancer vanga thi pakhat a awm. Thenzawl bialah mi 11 thiin, cancer vangin mi pakhat a thi a; Saitual biala thi mi 13 thi zinga pathum chu cancer vangin an thi. Aizawl East bialah mi 23 thiin, pali chu cancer vanga thi an ni.

Vanglaini palaiin a kawmnaah Pastor Biak­thansanga chuan, SDA-in zûk leh hmuam an do chhan ber chu I Korinth-a mihring taksa thianghlimna chungchang leh hmun danga Pathian thute chu an in­nghahna a nih thu a sawi a, "Bible hian zûk leh hmuam tiin a sawi chiang fak lo nâ a, medical science-in a ṭha lo tih a pawm avangin, Bible-in a sawi angin kan taksa tichhetu hi kan do mai a ni," a ti.

Pastor Biakthansanga chuan, Seventh Day kohhran chu kum 1863-ah USA-ah din a ni a, din a nih aṭangin zûk leh hmuam chu an do nghal tih a sawi bawk.

Seventh Day Adventist kohhran hi Mizoramah chuan December 7, 1949-ah missionary WG Lowry-a'n a din a ni a; member 25,000 vel an awm.

Hetih lai hian, National Family Health Survey 2015-16 tarlan danin, India hmar­chhak state zingah Mizoramah zûk leh hmuam ti an tam ber a, Mizo mipa kum 15-49 inkar 80.40% leh hmeichhia 59.2% ten zuk leh hmuam an ti. India hmarchhak biala mihring 10,000 zelah mipa 112 leh hmei­chhia 60-te chu cancer vanga thi an ni a, India ram pumah mi 10,000 thi zingah mipa 47 leh hmeichhia 44-te chu cancer vangin an thi a ni.