Tuirini lei dawh mek enfiah

Chalfilh bialtu MLA, Dr Ngurdingliana chuan Inrinni khan a bial chhunga khaw hrang hrang a tlawh a, hmasawnna hnathawh dan enin, National Highway no. 150-a Tuirini lui kânna lei (bailey bridge) dawh ṭhat tur pawh a en.

Tuirini lei dawh nan hian Rs. 3,90,69,000 ruahman a ni a, Essen Fabricator Pvt.Ltd.-in a dawh ṭan tawh a, kumin December thlaa dawh zawh tura tih a ni. Lei dawh chhunga a hêlna tur kawng pawh laih zawh a ni tawh.

Dr Ngurdingliana hian Horticulture department hnuaia Khanpui khuaa zîkhlûm chìn hun pangngai ni loa chíng turte ṭanpuina tur sum a sem a; Sesawng khuaa secondary school building sak thar a hawng bawk.