PYF Biennial Conference a ṭiak

Presbyterian Youth Fellowship Biennial Conference vawi 22-na, October 20, Zirtawpni zana Mission Vengthlang kohhran biak-ina neih chu nizan khan a ṭiak a; palai mi 503 kalin, kum 2017-19 chhunga hruaitu turte an thlang.

Presbyterian Church of India (PCI) General Assembly hnuaia ṭhalai pawl, PYC Conference-ah hian thupui chu 'Ropui taka ngamtu' tih a ni a; Zirtawpni zan khan palai lawmna inkhawm neih niin, Inrinni khan rorel a ni. Inrinni zing khan Rev. Zoramsanga hoin Pathian thu zirho a ni a, nimin chawhma inkhawm­ah Lalpa Zanriah Sakramen kilho niin, zan inkhawmah hruai­tu thlan tharte Pathian hnenah hlan a ni.

Kum 2017-19 chhunga hruai­tu turte an thlang a; assistant leader-ah Dr Lalrotluanga (Central KṬP), secretary-ah Rev. JR Kharmawlong (KJP Sepngi), assistant secretary-ah D Robert Thanga leh treasurer-ah JM Paswet (KJP Mihngi)-te an thlang. Leader atan PCI-in Rev. David L Chawnlu a lo ruat tawh bawk.

PYF Conference-ah hian PCI General Assembly hnuaia Synod hrang hrang - Mizoram Synod, Cachar Hill Tribes Synod, Manipur Synod, Biateram Synod, Ri Bhoi Synod, Khasi & Jaintia Synod (Sepngi), Khasi & Jaintia Synod (Mihngi), Zou Synod leh Karbi Anglong Synod-a ṭhalai pawlte an tel a; Central KṬP-in thlengin, Mission Vengthlang Kohhran biak-inah nghah a ni.