KHAWTHLIR

Thisen pe
Inrinni khan Aizawl leh Lungleiah ṭhalaite'n thisen unit 201 an pe. Aizawl Civil Hospital College Veng Branch KṬP-te'n an branch kum 39-na pualin thisen unit 56 an pe a, Venghnuai Branch KṬP-te'n unit 43 an pe bawk. Synod Hospital-ah PYD(NEI) Durtlang bialte'n thisen unit 7 an pe. Lunglei Bazar Unit ṬKP-in Christian Hospital, Serkawn tan unit 43 an pe a; Lunglei Civil Hospital tan Hnahthial South Bial ṬKP-in unit 42 leh Buarpui Welfare, Lunglei-te'n unit 10 an pe bawk.

BCM sum hmuh
Baptist Church of Mizoram (BCM) Finance department tarlan danin, April-September 2017 chhung khan pastor bial hrang hrang thawhlawm chhûn luh aṭangin Rs. 25,37,76,497 an hmu tawh a, hei hi kum 2017-18 atana budget Rs. 50,01,21,000 aṭangin 50.74% a ni. Kum chanve chhunga hmuh tura beisei, Rs. 25,00,60,500 chu Rs. 37,15,997-in an khûm tawh.

Jubilee lawm
Salvation Army, Kolasib Diakkawn Corps chuan Inrinni leh nimin khan an kum 50-na, golden jubilee an lawm. Jubilee lawmnaah hian Diakkawn Corps-a commanding officer lo ni tawh leh Diakkawn Corps aṭanga Salvation Army officer chhuak tawh mi ṭhahnem tak an tel a ni.

Heroin man
Champhaia Excise & Narcotics department chuan October 20, 2017 zan dar 7:30 khan Champhaiah heroin gram 15.100 an man. Heroin neitua puh Lallawmzuala (25) s/o Lalramzauva, Champhai Bethel Veng leh Lalchawiliana s/o H Lalduha, Champhai Vengthlang nia inchhálte an man nghal a; October 21 khan Court-ah hruai niin, Champhai District Jail-ah dah luh an ni.

Zalen chhuak lo
Zalen chanchinbu chu an khawlpui awmnaah Inrinni zan khan kawlphetha a awm loh avangin nimin khan a chhuak thei lo a; Zalen editor & staff-te chuan chhiartute hriatthiamna an ngen a ni.

Meet khar
Kolasib Inter-Office Sports Meet chu October 20 khan Kolasib Hmarveng YMA Hall-ah khâr a ni a, bialtu MLA PC Zoram Sangliana'n a hmanpui. Khuallian chuan, infiamna chu hman thiam chuan hring nuna thil ṭangkai tak, taksa leh rilru hriselna atan pawimawh a nih thu a sawi. Meet-ah hian sorkar department hrang hrangte chu group pali-ah ṭhen an ni a, infiamna chi hrang hrang hmangin an intihsiak a ni.

Tipper-in hnâwl
October 20, Zirtawpni zan zanlai vel khan Kolasib district-a Bualpui khuaah Lalthuli in, Assam type, Lalhmuaki luah lai chu tipper-in a hnâwl. Thu dawn danin, tipper-in in a hnâwl lai hian in chhungah an awm an awm lo. In hi a chhe hneh hle a, bung­ruate chu Inrinni khan Bualpui khawtlangin an chhar khawmsak a ni.