Sikserh vangin mi pahnih thi

Health & Family Welfare department hnuaia State Vector Borne Disease Control Programme (SVBDCP) chhinchhiah danin, Mizoramah kumin January aṭanga June thla thleng khan sikserh vei mi 3,720 an awm a, mi pahnihin an thihpui.

Covid-19 hripui léng karah SVBDCP chuan sikserh leh thosiin a thlen theih natna hrang hrang dang - Dengue, Japanese Encephalitis, Filaria leh Chikungunya dona kawngah hma a la mek zel a; sikserh venna atana hmalakna pawimawh pakhat - damdawia chiah sa thosi lên chu Mizorama district hrang hrangah sem chhuah zawh a ni tawh. DDT hmanga in chhung kah pawh kalpui mek a ni bawk.