State páwna tangkhang zingah Mizorama haw duh an ṭhahnem
Mizoram sorkarin inkhàrkhip vanga state páwna Mizo tangkhang haw duhte an awmna hmuna Mizo welfare/association-a inhriattir tura a tih hnuah, haw duh inhriattir an ṭhahnem hle. Vanglaini palaiin a biakpawh state pasarih aṭanga haw duh ringawt pawh mi 5,000 chuang an ni.
Vanglaini thu dawn danin, Mizoram sorkar chuan state páwna tangkhangte tan an awmna khua/state-a Mizo welfare/association hruaitute kaltlangin inhriattir theihna hun a siam a ni.
State páwna tangkhang haw duhte chu Mizo hruaitute hnenah an inhriattir a, hruaitute'n Mizoram sorkarah an hriattir chhawng ve leh ang. State ṭhenkhat chuan Mizoram sorkar hnenah tangkhang haw duh zat an hriattir tawh a, inhriattirna hun la hawng mekte pawh an awm.
Mizo tangkhang haw duhte haw dan tur chu Mizoram sorkar leh an tangkhanna hmuna state sorkar thuneitute inberáwnin an ruahman dawn. Tangkhangte chu an awmna state aṭangin rél hmanga hruai haw an ni dawn a, khawi thleng nge réla hruai an nih turah thutlukna siam a la ni lo a, thuneitute'n an buaipui mek.
Mizoram páwna tangkhangte hian réla chuan man (fare) an intum a ngai dawn a, inhriattirna tur form-ah rélin a kal theih chin baka an haw dan turah mimal lirthei nge, lirthei dang hman (hire) tur tihah duh thlan tur a ni.
Vanglaini palai chuan nimin khan Bangalore, Chandigarh, Chennai, Delhi, Goa, Kolkata leh Mumbai khawpuia Mizo hruaitute a bia a; khawpui pasariha haw duh inhriattir tawh zat chu mi 5,000 chuang an ni. Hetih lai hian, tangkhang ṭhenkhat erawh chuan Mizorama haw an la duh lo thung.