Zoram malsawmnate haichhuah a nih theihna atan ṭawiawm turin Chief Minister-in mipui a sawm
Ni hnih awh Reiek Tourist Resort-a Tourism department-in Anthurium Festival an buatsaih chu October 15, Inrinni khan khar a ni a, festival hmanpuitu chief minister Zoramthanga chuan Zoram malsawmnate haichhuah a nih theihna atan ṭawiawm turin mipui a sawm.
Chief Minister chuan tourism chu Mizoramin pawisa a lakluh tam theihna a nih thu sawiin, "Delhi leh khawpui lian tak takah chuan boruak thianghlim lo avangin an hriselna thlengin nghawng ṭha lo a awm phah thei. Mizoramah erawh a thlawn in boruak thianghlim tak hip tur kan neite hi kan vanneihna a ni," a ti.
Mizoram nawmnate chu khualzin hipna atan leh sum lakluhna atan hman thiam a pawimawh tih sawiin Zoram-thanga chuan, "Chumi atan chuan ruahmanna hrang hrang siam a, sum chungchangah pawh financial institution lian tak takte dawrin a ṭul anga bawhzui zel a ni ang," a ti a, Zoram malsawmna haichhuak a, hmasawnna leh hausaknaa chhuah turin mipuite ṭawiawmna a ngen.
CM chuan anthurium pangpar chu ram dang aṭanga Mizorama lakluh, hlawhtling taka tharchhuah tâk a nih thu sawiin, "A hming chawia festival pawh nei thei hial khawpa a tam thama thar leh hralh chhuah a ni hi a lawmawm. Kan ram leilung hi thil tam tak tharchhuah nan a ṭha a, economy hmasawnna atana hlu tak a ni," a ti.
Khualzahawm Tourism minister Robert Romawia Royte chuan November 17, 2022-ah a ruala guitar tum tam ber record (largest acoustic guitar play ensemble) siam tum a nih thu sawiin, ṭingṭang perh thei chu a tam thei ang ber tel turin a sawm.
Anthurium Festival khar inkhawmah hian dy. chief whip Lalrintluanga Sailo leh chief secretary Dr Renu Sharma-te pawhin thu an sawi.
Festival ni hnihnaah hian hnam lam, zaithiam/band leh fashion show bakah, intihlimna chi hrang hrang buatsaih a ni.
Anthurium Festival atan hian Ministry of Tourism chuan cheng nuai 25 a tum a ni. Festival hi Covid-19 leng avangin kum hnih chhung virtual mode-a hman a nih hnuah Reiek Tourist Resort-ah kumin hian hman leh a ni.