Mizoramah Mega National SC-ST Hub Conclave buatsaih

Ministry of Micro, Small and Medium Enter­prises (MSME) chuan October 15, Inrinni khan Dawrpui Multipurpose Centre-ah Mega National SC-ST Hub Conclave an buatsaih a, Commerce & Industries minister Dr R Lalthangliana'n a hawng. Minister chuan, sorkar laipuiin Mizoramah MSME office ṭhenkhat sakna tur pawisa a pek theih chuan Mizoram sorkarin a hmunhma tur a ngaihtuah sak thei tih a sawi.

Dr R Lalthangliana chuan, MSME hnuaia branch hrang hrangte chu Mizoramin a mamawh nasatte an nih thu a sawi a, "DIC, MSME-DFO, KVIC, NSIC etc. te hi mipuite'n awlsam taka an ban zung zung theih nan Mizoramah office building pakhatah awm khawm thei se tih chu duhthusam a ni a, Ministry lamin a sakna tur sum an pek theih dawn chuan office bulding leh staff quarters sakna tur hmun chu Mizoram sorkarin a ngaihtuah thei," a ti.

Mizoram hmun tam zawk chu tlangram a nih avangin industry lian tak tak din a rem lo tih sawiin Dr Lalthangliana chuan, "MSME chhin­chhiah danin Mizo­rama industry ding zinga 97.36% chu industry tenau (micro enterprises) an ni a, chung zinga a tam ber chu cheng nuai 10 tling lo senga bul ṭan an ni," a ti a, an zinga a zatve vel chuan loan la loin anmahni sum sengin bul an ṭan niin a sawi.

Minister chuan bul ṭan tura loan lak kawngah leh thil hrang hrangah Mizoram chu kaihhruai a la ngai hle tih sawiin; Ministry lam aṭangin theihtawp chhuahpui tur leh an inkaihhruaina hman laite pawh Mizoram leh India hmarchhak state-te tan tlema thlahdul hlek a ṭul thute a sawi a; bank ho pawh loan pek chhuah kawngah in hawng zau a, loan dilte pawh rang taka tih chhuah kawngah ṭan la thar tur leh Mizorama DIC-te thuam chak thar leh turin sorkar laipui hotute a ngen bawk.

National SC-ST Hub hi kum 2016 khan prime minister Narendra Modi chuan a hawng a, programme in a tum ber chu India rama Scheduled Caste leh Scheduled Tribe zinga mahni kutkawiha eizawnna ngelnghet nei duhte bul ṭanna tur atana kawng sial sak leh ṭanpui a ni a; hetiang lama tui leh ngaihven duh tan https://msme.gov.in/ ah zirchian theih reng a ni.

Conclave-ah hi technical session pahnihah ṭhen niin mithiamte'n - central public sector enterprises & bank leh Government e-Marketplace (GeM) & Rural Self Employment chungchang an zirtir a ni.

He hunah hian MSME secretary BB Swain, joint secretary Mercy Epao, chief information commissioner Lalnunmawia Chuaungo, Commerce & Industries principal secretary Esther Lalruatkimi leh sorkar hotu dangte bakah, Mizorama MSME entrpreneurs-te an tel.

Minister thusawi ṭhenkhat
■ Covid-19 hripui lengin Mizoram na takin a nghawng a, mi tam takin eizawnna an chán.
■ Tun thlengin hripui len hma ang kha pha tawh loin harsatna an tawk a, anni ho khaichhuah nan MSME hi a pawimawh tak zet.
■ Ministery of MSME in cheng vbc 9.72 a rawn pek hmanga Luangmual leh Lengte-a ruahtui dahkhawlna tur sak mek chu zawhfel hun tur bituk aia hmain an zo thei dawn.
■ Flatted Factory Complex pali - IGC Luangmual (cheng vbc 9.98), Industrial Estate Kolasib (cheng vbc 14.99), IIDC Pukpui, Lunglei (cheng vbc 9.98) leh IIDC Zote, Champhai (cheng vbc 9.93)-te chu MSME Ministry in an ngaihtuah mek.
■ Union Minister of MSME Narayan Rane pawhin an pawm hunah Mizoram rawn kala lungphum rawn phum a duh.