Rev. VL Hruaia a chhuak dawn
Health minister Dr R Lalthangliana chuan, Zoram Medical College (ZMC)-a Covid-19 vanga thla khat chuang enkawl chuan hripui a vei tawh loh avang leh a dam chhoh zel avangin vawiin hian State Referral Hospital a chhuahsan theih dawn thu a puang.
Dr Lalthangliana chuan, Rev. VL Hruaia chu sample test a negative vek tawh hnuah a taksain hma a sawn zel thu a sawi a, "Harsatna engmah a neih tawh loh avangin a dam fel tawha ngaih a ni a, Inrinni hian ZMC damdawi-in aṭangin chhuahtir a ni tawh dawn," a ti a; mi tam takin an ṭawngṭaisak vang leh ZMC-a amah enkawltu zawng zawngte thawhrim rah a nih thu a sawi.
Health Minister chuan, Kolkata leh Mumbai-a Mizoram House dinhmun a sawi a; Mumbai-a cancer vei damlo pakhat leh House-a thawk hnam dang pakhat Covid-19 vei mekte bak chu vei dang an awm tawh loh thu a sawi. Mipuite chu sorkar thupek zâwma fimkhur turin a chah a, social distancing zawm ṭhat leh kut silfai ngunte bakah, sorkarin dan zawm tur a chhuahte zâwm ṭha turin a chah a ni.