Naga zirlaiten cultural day an hmang; Lehkhathiam mahni nihna hre lote chu Ram tan an hnawk ṭhin - L Thangmawia

Naga Students’ Union Mizoram (NSUM)-te chuan October 15, Inrinni khan Art & Cultural Auditorium, Aizawlah 'Freshers Meet cum Cultural Day' vawi 24-na an hmang a, Human Resource Development board vice-chairman L Thangmawia, MLA in a hmanpui a, lehkhathiam mahni nihna hre lote chu ram tan an hnawksak thu a sawi.

L Thangmawia chuan, Mizorama Naga zirlaite'n har-satna an tawh apiangah anmahni ṭanpui turin Mizoram sorkar a inhawn reng thu a sawi a, "Hlawhtlinna duhawm tak nen Mizoram aṭangin in rama in kir leh ngei theih nan duhsakna ka hlan che u a ni," a ti.

Inkhawm thupui 'Toward Identity & Empowerment' tih chu tunlaia zirlaite leh ṭhalaite tana thil pawimawh ber zinga mi a nih thu sawiin L Thangmawia chuan, "Mahni nihna leh hnama chiangte reng reng chu lehkha an thiam san poh leh mipui vantlang tan an ṭangkai a, ram leh hnam tana thawk an ni tih an hriat avangin eirukna leh hlemhletnaah an fihlim. Tlawmngaihna nen mipui tan an mawhphurhna neihsa piah lamah an thawk fo ṭhin a ni," a ti a, lehkhathiam, mahni nihna/identity hre lote chu an thiamna a san zawh poh leh ram tan an hnawksak tih a sawi.

Thangmawia chuan self empowerment a pawimawh thu te, zirlai nih lai aṭanga harsatna hmachhawn tura mahni intuaihriam a pawimawh thu leh mahni tan mai ni loa midangte tana hnathawh duhna rilru chuan chakna thar leh hlimna a pek fo ṭhin thute a sawi bawk.

He hun hi Eli Neihoikim Doungel-in a kaihruaia; NSUM president Eno Takalong Kichu pawhin thu a sawi.

NSUM-ah hian zirlai 189 an awm mek a; Mizorama zirna in hrang hrang - AICS, ATC, COH, MZU, NIELIT, RIPANS, CVSAH leh ZMC-a zirlaite an ni.