Tourism-in Bangkok kalnaah Rs 10,15,682 séng ; Mizoram sorkar sum hman a ni lo - Tourism
Tourism department chuan, Bangkok, Thailand-a North East India Festival 2022-a Mizoram aṭanga mi 23-te kalna atan Rs 10,15,682 an séng a, Mizoram sorkar sum hman a ni lo tih an tarlang.
RTI Act hmanga zawhna Tourism department-in an chhan danin, Bangkok-a North East India Festival 2022-ah Mizoram aṭangin mi 24 an kal a, an zinga tel ve Tourism minister Robert Romawia Royte nupui chu mahni sensoa kal a ni.
Sorkar official panga an tel a, chu'ngte - Tourism department aṭangin Minister, Joint Secretary, Deputy Secretary, Assistant Tourist Officer leh Private Secretary to Minister-te an ni a; cultural troupe member 16 leh tourist operator pahnih an tel.
NEI Festival-a kalte hian July 28, 2022-ah Mizoram an chhuahsan a, August 2, 2022-ah Mizoramah an rawn kîr. Thlawhtheihna chuan man atan cheng nuai 6.48 hman a ni a; mi 24-te tan hian room 13 luah niin, hotel thlenna atan cheng nuai 1.09 hman a ni. DA pek an awm lo a, Bangkok-a veivahna (local transportation) man leh zanriah man tumsak an ni.
Sum senso zawng zawng zat zawhna chhangin Tourism department chuan, "Mizoram Tourism department-in Rs 10,15,682 a séng ral a, Mizoram sorkar sum hman a ni lo," an ti.
Tourism department tarlan danin, Festival-a Mizoram aṭanga kalte chu Tourism official leh cultural troupe-te an ni a; cultural troupe-te chu Mizo hnam làm thiamte aṭanga thlan an ni.