Mizoram aṭanga kuhva tawlhruk Buaipui ṭhin nia sawi an man

Assam police-te chuan Mizoram aṭanga kuhva rah tawlhruk hna buaipuitu leh an hotulu nia sawi Musa Ahmed Siddiqui, Nilambazar (Karimganj) an man. Cachar SP Numal Mahatta chuan Musa Ahmed man a nih thu hi October 15, Inrinni khan a puang.

Cachar SP chuan Musa Ahmed Siddiqui hi kuhva tawlhruka an thluak bur ber a nih thu sawiin, "Kum khat chuang kan zawng tawh a, a tlanbo reng a ni. Nilambazar-a cheng nimah se, a sumdawnna hi Mizoram aṭangin a buaipui thung. Silchar Airport aṭangin Assam a rawn lut dawn tih kan hre ru a, kan man thei ta a ni," a ti.

Musa Ahmed Siddiqui hian dan loa sumdawnna a kalpuinaah mi tam tak a thawhpui tih sawiin Cachar SP chuan, "State dangah chuan mi challang tak tak thurualpui a neih avangin a him a ni," a ti a, Cachar kaltlangin kuhva rahte hi a tawlh ṭhin thu a sawi.