ZPM-in sorkarna kan siam a nih chuan thlai man kan thunun ang - ZPM Leader

ZPM chuan October 15, Inrinni khan Khuangphah leh Vaikhawtlang khuaah vantlang inkhawm an buatsaih a, he hunah hian ZPM leader Lalduhoma chuan ZPM-in sorkarna an siam chuan, sorkarin thlai man (rate) a thuhnun tur thu a sawi.

Lalduhoma chuan an sorkar chuan thlai thar an lei tur thu sawiin, "Kan thlai lei turte chu inthlan dawnah kan hotuten an puang dawn a ni. Sawhthing pawh hi kan sawi fo tawh a, kum engemaw chhung tal hi chu kan lei dawn. Rs 50 in kan lei dawn a, hei hi a man tlahniam tur venna chauh a ni," a ti.

ZPM Leader chuan vegetable supply chain an kalpui tur thu sawiin, "Lockdown laiin kan hmang a, thlai thar man tlawm zawkin kan lei thei a nih kha. Kan thlai mante man man zawka kan hralh theih nan private enterpreneur-te nen thuthlung ziakin ruahmanna ṭha tak kan siam dawn," a ti a, sorkarin thlai rate a thunun tur thu a sawi.

ZPM chu party ṭhangduang ber an nih thu sawiin ZPM Leader chuan, "Party pahnihin hun rei tak min kaihruai a, an theihnate kan hre vek tawh. Tunah hian Congress ni lo, MNF ni lo sorkar kan mamawh tih hi mipuite rilru a ni ta. Kan khingpui lamah hian party ruh kawl mi tlemtein rorêl an tum a, mahni ṭanghma hai duhte chauh an ni,” a ti.

Lalduhoma chuan an party-a mithiamte nen kum hnih chhung uluk takin an policy an zirho tih sawiin, "Kan tih theih leh kan tih ngei ngei tur chiah kan duang a ni. Fel takin calendar kan siam," a ti a, an sorkar aṭanga ni za chhunga tih turte, kum khat chhunga tih turte an duan lawk vek thu a sawi.