Mi kutthlaktu lakah FIR thehluh a ni ; Pawl hrang hrangin kutthlaktu an dem

October 15, Inrinni zan khan B Zalawma, Tuikual North chu Daniel Sailo, Ramhlun Venglai chuan kut a thlak a, a kutthlak lai video hi social media-ah a darh nasa hle. Daniel Sailo lakah hian FIR thehluh a ni a, police-in an chhui chiang mek.

He thil thleng chungchangah hian Tuikual North Local Council leh All NGO, Dampa Group YMA leh West Phaileng Welfare, Aizawlte chuan thuchhuah siamin, Daniel Sailo hi an dem thu an tarlang hlawm.

Tuikual North LC leh All NGO chuan an veng mi B Zalawma chunga kutthlakna a thleng chu an dem thu tarlangin, "Kutthlaktu Daniel Sailo hi MCS 2014 batch, under secretary (Finance & DMR) nia hriat a ni.Hetianga ama inchhung ngeia a pa rual hmusit taka a ṭawngkhum leh rawng taka kut a thlak hi kan dem tak zet a ni," an ti.

Tuikual North LC leh All NGO chuan, "Mizo hnam nuna aia upa zah leh tlawmngaihna nun hre lo, mahni pate rual pawh kutthlak hreh lo hi kan khawtlang tan a him lo hle in kan hria a, kan veng leilung rawn rap tawh lo turin kan duh a ni," an ti a, mize zahpuiawm tak nei officer chu sorkarah nihna pawimawh nei tlakah an ngaih loh thu an tarlang.

West Phaileng Welfare, Aizawl chuan B Zalawma chu an khaw chhuak a nih thu tarlangin, "Tunah hian Tuikual North-ah a inbengbel tawh. A ṭhatlai hun zawng zawng khawtlang leh kohhran tan a hmang ral a, middle school zirtirtu pension. Kum upa zawk leh chak lo zawkte chungah hleilenna hi tun hnuah thleng tawh lo se kan duh lo takzet," an ti.

Dampa Group YMA chuan B Zalawma chu Dampa Group YMA president hlui a nih thu tarlangin, "Daniel Sailo-in ama in chhung ngeiah kal chilha ṭawngkam mawi lo tak taka a ankhum leh kut hial a thlak hi zahpuiawm kan tiin kan dem takzet. Hetiang MCS officer chapo, thingtlang mite min hmusittu, aia upa zahna chang hre lo leh nunphung hre miah lo hi a chhawrtu Sorkar hian na takin hrem rawh se," an ti bawk.