Mission Veng kum 125-na lawm mek

Mission Veng chuan tunlai hian an veng kum 125-na an lawm mek a, kar kal ta chhung khan a lawmna chi hrang hrang an hmang.

Mission Veng kum 125-na lawmna atan October 15, Inrinni zing khan cycle rally an buatsaih a, mi 30 vel telin, an veng din ṭanna hmun, Banglapui tual aṭanga Thingpuihuan Tlang thleng an tlân a ni. Inrinni vêk khan niléngin Mission Veng Kohhran Hall-ah Mission Veng Titi an buatsaih a; an veng mipui leh an veng mi ni ṭhin, tuna hmun danga awm tawh mi ṭhahnem tak an tel a, Mission Veng din ṭan dan leh tun hma leh tunlai chanchinte an sawi khawm a ni.

Mission Veng hian kumin September 8 khan an veng kum 125-na an lawm ṭan a, kawng hrang hranga an lawm tawh bakah, kar kal ta khan infiamna chi hrang hrang an buatsaih. A lawmna pui ber chu October 22, 2022 khian an nei dawn a, kumin December 2-ah kum 125-na lawmna an khâr ang.

Mission Veng dintu Rev. DE Jones, Zosaphluia bakah, Rev. FW Savidge (Sap Upa) leh Rev. JH Lorraine (Pu Buanga)-te chu October 23, 1897 khan Thingpuihuan Tlang aṭangin tuna Banglapui hmunah an insuan phei a, chu chu Mission Veng din ṭan ní-ah ngaih a ni.