Oct. 1-15 chhungin heroin kg. 8.747 man

Mizoram police-te chuan kumin October 1-15 chhung khan hmun hrang hrangah heroin (no. 4) kg. 8.747 an man a, a tam ber chu Champhai district-a man a ni.

October thla chanve chhungin police-te'n ṭum sarih heroin an man a, ṭum ruk chu Champhai district-a an man niin, ṭum khat erawh chu Aizawla man a ni. Heroin man zawng zawng chu cheng nuai 716.3 man a tling.

October thlaa ṭum khata heroin an man zinga tam ber chu October 13, 2022 kha a ni a, Champhai Tuipui lui bula an man niin, kg. 6.83 a tling a, cheng nuai 341.8 hû a ni.

Heroin man kaihhnawihah mi pakua man an ni a, an zinga pathum chu Karimganj, Assam lam mi niin, Myanmar mi pahnih leh Manipur mi pakhat an tel a; a bak zawng chu Aizawl leh Champhai lam mi an ni. An lakah NDPS Act leh Foreigner Act hmangin thubuai ziah luh a ni.

Mizoram police-te chuan October thla kal mekah pawisa lem Rs 98,000, dan loa ramsa tawlh rûk 140 leh kuhva rah ip 116 leh rakzu litre 300 an man tawh bawk.