Covid-19 vei an tlem tial tial

Mizoramah Covid-19 vei October 14, Zirtawpni khan mi 13 leh October 15, Inrinni khan mi paruk hmuh chhuah a ni. Hripui vanga thih belh an awm lo a, nimin tlai khan Covid-19 positive mi 61 awmin, an tlem tial tial.

IDSP aṭanga thu dawn danin, October 14-a Covid-19 positive mi 13 hmuhte chu swab sample 160 endik aṭangin 8.13% a ni a; Aizawl district-ah mi pali, Mamit leh Saitualah mi pathum ve ve, Lungleiah mi pahnih leh Khawzawl district-ah mi pakhat hmuh a ni.

October 15, Inrinnia hmuh chhuah parukte chu Aizawl district-a mi pathum, Saitual district-an mi pahnih leh Lunglei district-a mi pakhat an ni a; positivity rate chu sample 153 endik aṭangin 3.92 chiah a ni.

Nimin khan hripui laka fihlim tawh mi 11 chhuahtir an ni a, Inrinni khan mi 25 chhuahtir an ni bawk.

Mizoramah swab sample 19,85,976 endik tawh niin, Covid-19 vei 2,38,680 hmuh chhuah a ni tawh a, 12.02% a ni. Nimin tlai dar 4 thlengin mi 2,37,896 (99.67%) chhuahtir an ni tawh a, mi 723 (0.30%) thi tawhin, enkawl mek mi 61 (0.03%) an awm.