KHAWTHLIR

Pawl pangain thisen an pe
October 15, Inrinni khan Mizoramah pawl pangain thisen an pe. Civil Hospital, Aizawl tan ṬKP, Ramhlun South Bial chuan unit 58 an pe a, petute mipa 46 leh hmeichhia 12 an ni a; Isua Krista Kohhran ṭhalaite pawhin blood bank-ah kalin unit 36 an pe a, petute mipa 28 leh hmeichhia pariat an ni. KṬP, Dawrpui Vengthar Branch chuan Synod Hospital tan unit 51 pein, petute mipa 39 leh hmeichhia 12 an ni a; Aibawk Bial PYD-in ZMC Blood Bank tan unit 20 an pe a, petute mipa 16 leh hmeichhia pali an ni. Champhai College NSS pawhin Champhai District Hospital tan unit 25 an pe a, petute mipa 23 leh hmeichhia pahnih an ni.

Dincham lawm
Kanan Branch YMA chuan October 15, Inrinni khan an veng multipurpose hall-ah an dincham (kum 49 tlin) an lawm a, bialtu MLA Lalruatkima, minister of state-in a hmanpui. Lalruatkima chuan Kanan Branch YMA-in hunkhirh leh harsa an tawk ṭhin chunga Pathian hruainaa golden jubilee hmang mai tura inbuatsaihna chu lawmawm a tih thu a sawi. He hunah hian zirlai hlawhtlingte chawimawina, golden jubilee logo tlangzarhna leh golden jubilee khuhhawnna hun hman tel nghal a ni.

Pawisa lem man
Champhai Police-te hian Inrinni zing khan Champhai aṭanga Aizawl kal tur maxicab pakhat aṭangin Rs 500 note lem 196, a vaiin Rs 98,000 leh a neitu nia puh Laltlandiki (42) d/o Bawisanga (L), Zemabawk Kawn Veng nia inchhal an man a; a thlun zawmpui dangte chhui mek a ni.

Dan zawm lo man
Mizoramah September 1, 2022 aṭanga Motor Vehicles (Amendment) Act, 2019 hman a nih hnuah Lawngtlai police-te October 12, 2022 thleng khan traffic dan bawhchhia mi 144 an man a; an pawisa chawi tlingkhawm chu Rs 83,200 a ni. Lawngtlai police-te hian license tel loa lirthei khalh mi 13, helmet khum lo mi 54, rui chunga lirthei khalh mi panga, thupek zawm lo mi 10 leh parking dan bawhchhia mi 62 an man a ni.