KHAWTHLIR

July 25, Inrinni khan Chaltlang Branch YMA-in an din champha vawi 73-na pualin Aizawl Civil Hospital (ACH) tan thisen unit 106 an pe a, petute mipa 90 leh hmeichhia 16 an ni. Liverpool FC Supporters Club, Mizoram-in English Premier League-a Liverpool FC champion lawm nan thisen pek rûnpui huaihawtin, ACH-ah thisen unit 57 leh Lawngtlaiah unit 5 an pe. Mamit Bial ṬKP-in District Hospital-ah unit 24 pein, petute mipa 22 leh hmeichhia pahnih an ni a; Chhura Hmun Welfare, Champhai Bethel Veng­in unit 10 pein, peturte mipa pariat leh hmeichhia pahnih an ni.

July 27, 2019-a thi accredited journalist DK Lalhruaitluanga, Rihlipui editor, Champhai chu July 25, Inrinni khan Mizoram sorkarin Rs. 1,50,000-in a rál. Ràlna hun hi Champhai Veng­thlanga an inah buatsaih a ni a, Champhaia IPRO Dr Lallawmkima'n DK Lalhruaitluanga nupui Laldinpuii hnenah ràlna sum a hlân. Accredited journalist an thihin Mizoram sorkar chuan Rs. 1,50,000-in a rál ṭhin a ni.

Buhchang-Phaisen kawng, km. 9.3-a thui chu July 24, Zirtawpni khan PWD engineer-in-chief K Lalsawmvela'n a hawng. Kawng siam nan cheng nuai 3,918 sèn a ni a, April 20, 2018-ah hna ṭan a ni. Thla 12 chhunga zawh tura tih ni mah se, fûr chhungin hna thawh a rem loh avangin hun tiam chhungin an zo hman lo a, March 20, 2020-ah siam zawh a ni. Kawng siamna atan hian NABARD RIDF XXII aṭanga loan puk cheng vbc. 3526.28 leh Mizoram sorkar sum cheng nuai Rs. 391.81 hman a ni.

Minister of state Robert Romawia Royte chuan July 25, Inrinni khan North Serzawl Education Committee-in an khaw mi zirlai pass tharte chawimawina hun an buatsaih a hmanpui a; zirlaite chu taima taka zir zel tur leh an khaw chhuak mi ropui tak takte entawn turin a fuih. N Serzawl khawtlangin an khaw khelmual thar laihna tur sum an dil chungchangah Minister chuan, September 2020-ah sorkarin a ngaihtuah tur thuin a chháng a ni.