Lo neitute hnenah buh chi sem

Kolasib District Agriculture Office hmalaknain nimin khan Kolasib district-a Kolasib, Bilkhaw­thlir, Vairengte, Kawn­pui, Bairabi leh Bûkpui circle hnuaia lo neitu mi 599 hnenah tlang ram buh chi ṭîn 847 sem a ni. Buh semna hi district bawrhsap Dr H Lalthlangliana'n a hmanpui.

Dr H Lalthlangliana chuan, Covid-19 vanga inkhàrkhip a nih chhungin ei leh bara intodelh duhna kawngah harh tharna a thleng mek tih a sawi a, "Mizo ṭhalaite'n hemi kawngah hian hmasawn tuma an beih a ṭul. Hamṭhatna leh ṭanpuina dawngte'n hlawhtlin tuma tih tak zeta kan beih ve hi sorkara lawmthu sawina ṭha ber a ni," a ti.

Kolasib DAO J Rothanga chuan, lo neitute tan inkhàrkhip chhungin buh leh thlai dang chîṭum eng emaw zat sem a nih tawh thu a sawi a, "Tlang ram buh chî sem chhuahte aṭanga chhût hian, Kolasib district-ah buh hmun ṭín 900 (hectare 360) vel a awm tura ngaih theih a ni," a ti a; buh chi sem turin Chawilung khuain a thlawna buh ṭîn 51 an pek thu a sawi.

Buh chîte hi khua/veng hrang hranga task force-te kaltlangin lo neitute hnenah sem tur a ni a, nimina sem chhuahte hi Ratu, Zohmun, Làmchhip, Chawilung, Zanlawn leh Kawnpui aṭanga lak khawm a ni. Ṭín khat Rs. 450 zela lei a ni a, Chawilung khuain a thlâwnin an pe thung.