Garage nei tura tihah khauh dawn Rate aia sang fare late report turin ngen

Coordination Committee on Traffic Management hnuaia Working Group Committee hotute chuan, November 30, 2017 ral hmaa lirthei nei zawng zawngte a dahna garage nei vek tura sorkarin a tih chu khauh taka kenkawh a nih dawn thu an sawi. Taxi leh two wheeler taxi, rate aia sanga chuan man late chu Transport department-a hriattir zel turin mipui an ngen bawk.

Working Group Committee hotute hian nimin khan IPR directorate auditorium-ah thuthar thehdarhtute an kâwm a; Committee chairman Lalbiakzama, Home department additional secretary chuan, kum 2016-a sorkarin lirthei nei zawng zawngte garage nei tura kum khat leh thla hnih chhung hun a pek chu November 30, 2017-ah a tawp dawn tih sawiin, "Garage nei vek tura hriattirna hi kan nawr na dawn," a ti.

Lalbiakzama chuan, lirthei neite garage nei vek tura tihna dan chu September 1, 2010-ah siam a ni tawh tih sawiin, "A tir lama hmalaknaah pawh awmzia a nei viau. Motor registration number MZ-01 F-7188 hnua lam zawng chu garage neia inchhál vek an ni," a ti. Garage nei vek tura tihnaah hian Aizawl Municipal Corporation leh an hnuaia local council-te nen an thawkho tih sawiin, tunah hian local council hrang hrangte'n an huam chhunga lirthei neite leh garage nei leh nei lote an enfiah mek tih a sawi.

Lalbiakzama chuan, Aizawla traffic tâwt lutuk tihziaawmna atana tun October thla chhunga lirthei intlân chhâwktir chuan traffic jam a tiziaawm deuh tih a sawi a, "Mipuiin min thlâwp ṭha a, a lawmawm hle. Chutih rualin, intlan chhâwk hi traffic jam solve na tak tak erawh a la ni lo," a ti.

Transport director R Remmawia chuan zawhna chhangin, lirthei registration number pek tawh chu thlak theih a ni lo tih a sawi a, "A neitu hming leh address a thlak theih a, registration number erawh chu Central sorkarin a phal lo. Inter state transfer-ah erawh chuan number thlak theih a ni," a ti a; state dang aṭanga lirthei lak luh, thla 12 aia rei kawl tur chu number thlak (registratuion tih thar) ngei ngei a ngai zawk tih a sawi.

R Remmawia chuan, mihring phur chi sumdawnna lirthei (public transport vehicle) reng reng chuan man (fare) bithliah fel tak a awm tih sawiin, "Rate aia sanga chuan man la an awm chuan Transport department-ah hriattir turin mipui kan ngen a ni," a ti.

Trasport Director-in a sawi danin, taxi leh two wheeler taxi, rate aia sanga chuan man la report an dawnte chu DTO-in a ko a, zilh an nih bakah, chawitirte pawh an nei. Pawisa chawitir bakah, licence suspend sak pawh an awm tawh a ni.

Traffic SP C Lalthanmawia pawhin zawhna chhangin, Aizawl khawpuia traffic tâwt lutuk tihziaawm nan kawng chi hrang hrang hranga hmalak a ngai tawh tih a sawi a, "Awmze nei tak tak turin drastic measure tak tak lak a ngai tawh," a ti a; traffic tâwt lutuk tihziaawm nan rawtna hrang hrang an neih thu leh, chungte tihhlawhtlin chungchang chu sorkar thu a nih thu a sawi.

C Lalthanmawia'n Aizawl traffic tâwt lutuk tihziaawmna tura rawtna an neih a sawi zinga ṭhenkhat chu - parking building tam zawk siam, pawisa nei tan pawh lirthei lei a awlsam lutuk loh nan motor thar registration-ah khauh zawka kal, chhungkaw pakhatin lirthei lei theih zat bituk, motor hlui tawh, kum 10 aia upa Aizawla tlân luh phal lohte a ni.

Traffic SP sawi danin, tun dinhmunah Aizawlah ni tin motor thar register 30-40 vel a awm a, two wheeler ringawt pawh Aizawlah 70,000 chuang fê a awm tawh. Aizawlah ni tin motor 80,000 vel che kual anga chhût a ni.