MNF-in an din champha an hmang

MNF party chuan nimin khan Mizo Hnam Rûnah an party din champha, MNF Day vawi 56-na an hmang. Thu sawitu, MNF president Zoramthanga chuan, March 1, 1966-ah ram a buai tih sawiin, "Pumpelh tum teh mah i la, kan pumpelh thei lo a ni," a ti.

Zoramthanga chuan, MNF chu October 22, 1961-ah Laldenga in, Tuikhuahtlangah mi pariat velin an din tih sawiin, "Kum 1961-65 chhoah MNF chu Pathianin malsawmin a ṭhang duang hle a, mi pangngai chin chuan an zawm deuh vek a ni," a ti a; chutih laia MLA seat pathum awmah seat pahnih chu MNF-in a la thei nghal tih a sawi.

Mizoram buainaa a cheng hmet pertu ber chu Assam chief minister BP Chaliha a nia sawiin Zorama chuan, "Mizoramah sipai tir lut lo turin Pu Denga'n a ti a, amah Pu Denga chu zuk chhuk a, hmaichhana inbiak a rawt chung pawha ti duh loa Mizorama India sipai tir lut lui tlattu a ni," a ti.

MNF President hian rambuai laia sipaite chet dan leh MNF-te chet dan hrang hrang a sawi a; remna atana India sorkar nen an inbiaknaah Morarji Desai-a hunah a rem thei lo a, Rajiv Gandhi hunah June 30, 1986-ah inremna an nei thei ta tih a sawi.

Zoramthanga chuan, MNF-te chu kum 1998-2008 chung an sorkar hnuah chhung lama an insiam ṭhat nan Pathianin kum 10 chu eptu lamah a dah tih a sawi a; Congress sorkar kal mek kum 10 dáwn chhungin Congress party an tlachhe hle nia sawiin, "Chhiat namén loin an chhia a, MP 543 awmah MP 44 chauh an nei a, state inthlan a piangah an tla zel. Kan khingpuite an tlàwm phawt hi Pathian remruat dan a ni," a ti.

MNF President chuan, Pathianin Mizoram tana malsawmna a pek hai chhuak turin MNF chu an la sorkar leh dawn nia sawiin, "Lalpa'n India sipaite lak aṭangin min chhanhim a, India politics chhiat theihna khawp aṭangin min hruai chhuak a, kan mamawh ang zelin min hruai zel dawn a ni," tiin a sawi.

MNF din champha lawmna inkhawm hi vice president R Tlanghming­thanga'n a kaihruai a; senior vice president Tawn­luia pawhin thu a sawi a ni.