Medical college kalpui theihna atan Sorkarin MCI-ah dilna a thawn nawn

Mizoram sorkar chuan State Referral Hospital, Falkawna medical college kalpui a nih theih nan Medical Council of India (MCI)-ah dilna a thlen nawn mek. Medical college din dilna hi ṭum li an thawnna a ni.

State Referral Hospital hi Congress party-a Media department chuan nimin khan an chairman James Thangmingmawia hoin an tlawh a, medical superintendent Dr Lalhmuchhuaka leh asstistant medical superintendent Dr Jane Ralte ten lo dawngsawngin, damdawi-in dinhmun leh medical college tura an inpuahchah dante an hrilhfiah.

Dr Jane Ralte sawi danin, MCI hnenah medical college kalpui dilna hi kum 2014, 2015 leh 2016-ahte thawn a ni tawh a, kum 2014 leh 2015-ah chuan chhanna dawn a ni lo. Kum 2016-ah sorkar laipuiin enfiahtu a rawn tír a, mahse, an duh ang a tling zo lo. July 5, 2017 khan dilna thawn nawn leh a ni a, kumin October aṭang hian endiktute engtik hunah pawh lo kal thut thei an ni.

January 2, 2014 khan Centrally sponsored scheme (CSS) hnuaia medical college din tura sorkar laipuiin phalna a pek zingah State Referral Hospital, Falkawn hi seat 100 awm theihna tur zingah a tel a, May 16, 2014 khan Mizoram sorkar leh sorkar laipuiin memorandum of understanding an ziak. Medical college dinna atan hian cheng vbc. 189 ruahman a ni a, sorkar laipuiin 90% leh Mizoram sorkarin 10% a tum tura tih a ni.

Nimin thleng khan sorkar laipui­in cheng vbc. 102.2 leh Mizoram sorkarin vbc. 11.34 an pe tawh a, hei bakah hian damdawi-in tihchangtlunna atan NEDP hnuaiah kum 2017-17 ah cheng vbc. 28 leh 2017-18 ah cheng vbc. 15 dah a ni bawk.

Tun dinhmunah State Referral Hospital-ah hian khum 159 a awm a, kumin chhung (September thleng)-in mi 4,003 admit an ni tawh a, admit tam ber thla July-ah chuan mi 518 admit an ni. Thawktu mi 235 awmin, chu'ng zinga 39 chu doctor an ni a, 77 chu nursing staff an ni.

Medical college kalpui turin infrastructure lamah an inpeih thawkhat tawh tih sawiin Dr Jane Ralte chuan, "Infrastructure lamah chuan 99.9% velin kan inpeih tawh. Thawktu lamah erawh kan la inpeih lo deuh a, hei hi sorkarin a hria a, thawktu tur lak belh turin ruahmanna an siam mek a ni," a ti.

James Thanghmingmawia chuan, MNF sorkarin State Referral Hospial sak hna chu cheng vbc. 76.60 hmanga an thawh hnuah, tihngaihna hre loin an hluihlawn tih sawiin, "Congress sorkarin a chhunzawm a, tunah chuan Mizoram mipuiin an hmang ṭangkai tawh. MCI-in zirna atan hman tlaka a peih thuai beisei a ni," a ti a; damdawi-in puitlinna atana Congress sorkar hmalakna chhuanawm a tih thu a sawi.