MDA MLA leh AMC councillor-te'n Sorkar quarters thiah tum an tlawh

Mizoram Democratic Alliance (MDA) MLA-te leh Aizawl Municipal Corporation (AMC)-a councillor-te chuan nimin khan New Secretariat Complex-a sorkar hnathawk quarters, chhungkaw 18 luah lai ṭhiah a, a hmuna PHE Engineer-in-Chief pisa sak tumna chu a hmunah an enfiah a; sorkar thil tih tum dan chu ṭha an tih loh thu leh an dodal tur thu an sawi.

Sorkar quarters ṭhiah tum enfiahnaah hian MDA MLA zinga panga - Vanlalzawma, K Sangṭhuama, Lalruatkima, Lalrinawma leh Lalthanliana te an tel a; AMC aṭangin mayor PC Lalhmingthanga leh councillor-te an tel bawk.

MDA leader Vanlalzawma chuan, Congress party kaihhruai sorkarin in ṭha lai ṭhiat a, a thar sak leh an tuipui hle nia sawiin, tuna sorkar hnathawk chhungkaw 18 luah lai ṭhiah tura tih chu MNF sorkar laia sak a nih thu a sawi a, "Engineer-te'n an endik thlap hnuah mihring chenna atan building rinawm tak a ni tih an finfiah a ni. New Secretariat Complex Welfare Committee leh Khatla Local Council-te pawhin ṭha an tih loh, residential area-a sorkar office dah luih tum tlatna leh building ṭha pui pui tih chhiata sum siam tumna hi MNF chuan a tawp thlengin kan do dawn ni," a ti.

MNF tarlan danin, sorkarin quarters ding lai ṭhiah a, PHE E-in-C pisa sak a tumna hmun hi Plot B-17 a ni a, New Secretariat Complex Site Selection Committee meeting dt. 09/10/2013 rawt ang leh GAD-in a pek dan chuan, PHE department hnuaia Sewerage and Sanitation Circle office building atan a ni.

GAD lehkhaah chuan, kum hnih chhunga in sak a nih loh chuan ram pekna chu cancel anga ngaih tur a ni a; hmalakna a awm loh avangin 9/6/2015-a CS Conference Hall-a Committee meeting chuan Plot B-17 bakah, B-19 nen kaikawpin PHE E-in-C pisa hmun atan a pe leh a; mahse, building awmsa ṭhiat lo tura tih a ni thung.

Building awm sa ṭhiat loin PHED E-in-C pisa building chu sak chi a nih loh avang leh, residential quarters leh office innghêng renga awm chu a ṭhat loh avangin hmun dang remchang zawng tur leh, fimkhur zawka chu lai chu enkawl turin New Secretariat Complex Welfare Committee-in Chief Minister leh PHE Minister an ngen a; chumi hnu, 21.6.2017-a Chief Secretary hoa Site Selection Committee meeting chuan sorkarin PHE hnena ram a pek tawh chu an sût (cancel) a ni.

Hetih lai hian, PHE Minister hoa August 31, 2017-a Joint Committee of MPWD, PHED, GAD leh NSCWC meeting chuan ram chu PHE E-in-C pisa building sak nan an pe leh niin MNF chuan an tarlang a; PHE building sa turin Congress sorkarin contractor an hman thiam, Kolkata-a inbun an thlang fel tawh niin an sawi bawk.