Ek-in siamthat dan tur sawiho

Aizawl District Swachh Bharat Mission (Gramin) Third Quarterly Meeting chu nimin Aizawl bawrhsap Dr A Muthamma hoin a pisah neih a ni a; Swachh Bharat Kosh (SBK) kaltlanga êk-in thawm ṭhat (repair/renovate) ngai thlan chhuahte bawhzui dan tur leh India ram puma district hrang hrang SBM(G) rank-ah Aizawl district chu pakhatna a nih thuai theih nana hmalak dan turte an sawiho.

Dr A Muthamma chuan, open defecation free (ODF)-ah Aizawl district puan a ni chu lawmawm a tih thu leh mawhphurtute thawhrimna chu fak tlak a tih thu a sawi a, "Swachh Bharat Kosh hnuaiah hian ek-in thawm ṭhat nan pakhat atan Rs. 5,000 zel dah a ni. Kan district-ah hian Swachh Bharat Mission (Gramin)-in a huam khuate survey a nih hnuin ek-in thawm ṭhat ngai 3,205 a awm anga ngaih a ni," a ti.

Ministry of Drinking Water and Sanitation chuan SBM(G) hnuai­ah India district hrang hrangte faina kawnga an hmalak dan tehfung hrang hrang hmangin a khaikhin a; kumin September thla thlenga a lan dan chuan, Aizawl district score chu 89.75% a ni a, pasarihna a ni mek.

Kum 2014-a SBM(G) ṭan a nih hnuah Aizawl district-ah ek-in 1,517 sak a ni tawh a, vantlang inthiarna 23 siam niin, bawlhhlawh sawngbawlna hmun 23-ah siam a ni bawk.