Rajya Sabha MP-in central official-te Lirnghing a hmuna endik turin a ngen
Mizoram Rajya Sabha MP K Vanlalvena chuan July 24, Zirtawpni khan Union Earth Science ministry-a secretary Dr Rajeevan a hmu a; Mizoram khawchhak lama lirnghing ṭhin chu a hmuna endiktu tír turin a ngen.
K Vanlalvena hian East Science Secretary hnenah hian rawtna pahnih thlenin, pakhat chu Mizoram khawchhak lama lirnghing ṭhin a hmuna endiktu tur sorkar laipui mithiamte tir tura ngenna a ni a; pakhat dang chu - Pachhunga University College-in lirnghing chungchang zir chianna tura project an thehluh, sorkar laipuiin a lo hnâwl tawh chu tharthawh leh a, pawmsak tura ngenna a ni.
Dr Rajeevan chuan, kum 2000 hnu lamah hmarchhak bialah small siesmic change a awm thu sawiin, Mizoramah fault system pahnih a awm thu a sawi a; Mizorama lirnghing thleng ṭhin chu a hma aia uluk zawka an lo ngaihtuah tur thute leh endiktu tur tirh chungchang pawh meeting-a an lo ngaihtuah tur thu a hrilh.
MP K Vanlalvena hian July 24 vek khan Tribal Affairs secretary Deepak Khandekar chu a pisaah a kawm bâwk a, Mizoram sorkarin project a thehluh tawh, inkhàrkhip vanga tihkhawtlai pahnih a bawhzui. Deepak Khandekar chuan, hmarchhak state zingah Mizoram chu project thawk ṭha ber a nih avangin ṭanpui tura an inpeih reng thu leh Mizoram sorkarin a chhàn tur lehkha pakhat chhànna an hmuh hunah sum pek chhuah nghal a nih tur thu a sawi a ni.