Pawl hrang hrangin AR an dem

Champhaia sumdawng leh lirthei neitu pawl hrang hrangte tun hnaia Champhai Press Club-a ṭhukhawm chuan resolu­tion siamin, Assam Rifles-te'n khawchhak tlang­dunga chêngte tan harsatna an thlen thu an tarlang a, an chêt dan an dem.

Inhmuh khawmnaah hian Mizoram Truck Driver Association, Cham­phai Transport Union, Zoram Drivers Union, Champhai Taxi Owner Association, Champhai District Taxi Owner Association, EXIM Union Champhai Head Quarter, Champhai Import Export Union leh SYNDICATE hruaitute an tel. Páwl hrang hrangte chuan, Assam Rifles-te'n chhuanlam dawráwm tê tê hmangin Champhai district mipui leh khaw­chhak tlangdunga chengte tan harsatna hrang hrang an thlen niin an tarlang a ni. 

4    Champhai kawtchhuaha mipui zin veivâk lut leh chhuak, commercial vehicle leh private motor, damlo phurte leh ruang phur chena lo tiding a, an lo lipsê 

ṭhin bakah, ruang leh mitthi kuang thlenga lipsê an tum ṭhin hi kan duh lo hle. Mizo mipui zah lohna lian takah kan ngai a, chíng chhunzawm tawh lo se kan duh.

4    Assam Rifles hian kan member driver-te motor khalh lai, an nunna atana hlauhthawnawm khawpa lung leh tiang hmanga an bei ṭhin te, silai nena an rîkrâp ṭhin mai bakah, hmeichhia pawh thliar loa tharum hmanga an bei duh mai hi kan duh lo a, kan dem tak zet a ni. (Hetiang lam hawi hian July 23, 2020-ah Champhai by-pass road Khankawn leh Zotlang inkarah thil a thleng a ni)

4    Border area chauha duty tura tih an nih laia Champhai district hmun hrang hranga an duhna hmun apianga puan-in kaih a, hel ram ang maia mipui leh lirtheia eizawngtute zalenna min rahbehsak hi tuar thiam har kan ti. Champhai district-ah hian sorkar laka hel an awm kan hriat loh laia hel ram ang maia min rîkrâp 

ṭhin hi kan duh lo hle.

4    Kawnga thîr hlíng phah (road spike barrier) an duh hun huna an hmang ṭhin hi hriatthiam har kan ti a, kan duh lo. Kan ram chhung khawiah mah heng hmanrua hi hmang tawh lo se kan duh.

4    Mizo historical place - a bik takin Rihdil tlawh tuma hmun hla tak tak aṭanga khualzin leh zirlai kalte tana harsatna an siamsak ṭhin hi kan dem tak zet a, hetianga Mizo mipui zah lohna hi tun hnuah lantir tawh suh se.

4    Khawvel huap (pandemic)-a hri léng hlauhawm tak laka Mizo mipui thawhhona ṭha tak hnuaiah kan fimkhur tlàn em em lai a, Mizoram chhunga Covid-19 natna hrik pu darh nasa bertu sipaite'n khualzinte an endik ṭhin hi a him lo a, dinhmun derthâwng takah min dah niin kan hria. Hripui lèn chhung hi chu sipaite hi mipui lakah inthiarfihlim rih se kan duh hle.