Covid-19 dona pawisa awm zat mipuiin hriat an duh - Lal Thanhawla

MPCC president Lal Thanhawla chuan, "Covid-19 dona atan hian sorkar laipui aṭangin sum ṭhahnem tak a lo kal a, NEC aṭangin sum kan hmu bawk a, pawisa awm zat hi mipuiin hriat an duh. Sorkar hian Covid-19 dona tur sum a nei lo a nih chuan mipuiin an theih ang pawisa thawh hi an hnial ka ring lo," tiin Vanglaini a hrilh.

Finance changtu chief minister Zoramthanga chu pawisa awm zat sawi chiang tura phûtin Lal Thanhawla chuan, "Kan hotupa hian pawisa tamzia a sawi ṭhin a, chu chu mipui bengah hian a la châm reng a ni. Hman ni lawka pawisa tamzia a sawi kha a bo ta duak nge, sorkar hnathawkte thawh chhuah liau liau aṭanga Covid-19 dona sum khawn ngaia a lang ta hi a vanduaithlak hle," a ti a; Zoramthanga chu Finance minister a nih angin Covid-19 dona atana pawisa awm zat mipui hriatah a puang tur a nih thu a sawi.

MPCC President chuan sorkar hnathawkte hlawh thawh chungchangah, "Kan ram dinhmun enin sorkar hnathawkte hi hetiang hun harsaa ṭang thei tur leh midangte pui thei tur dinhmuna ding an ni a, an remchan anga sum an theh chhuah theih chuan a lawmawm khawp ang," a ti.

CM hlui Hawla chuan, "Mipui nawlpuiin ṭanpui duhna thinlung an pu a, mahni phak tawkah an luang chhuak a, kohhran leh tlawmngai pawlte leh sorkar hnathawkte ngei ngei pawhin Chief Minister's Relief Fund-ah pawisa an chhung lut ruih ruih hi a lawmawm ka ti. Hetihlai hian a sorkar ber hian a budget aṭang hian sum engzat nge a sen tawh?

Hripui avanga harsatna kan tawk dawn a nih chuan sorkar sum neih sa hi chu pawh khawm theih dan tam tak a awmin ka hria," a ti a, sorkar chu pawisa hman dan tur kimchang puanzar hi a bâa a hriat thu a sawi.

Lal Thanhawla chuan eptu party an nih avanga tun ang huna sorkar beih a hun lo tih sawiin, "Thil fel tawk lo deuh awmah pawh a theih chin chin kan ngawi a; nimahsela PPE an lei dan leh hnawhsaruma an kal dan, an thil lei chhe lutukte kha FIR thehluh lohna chi a ni lo," a ti.

MPCC President chuan, "Kan zavaiin hmelma thuhmun kan nei a, do thuhmun kan nei a, chu chu Covid-19 a ni. Chumi dona atan chuan kan party chuan sorkar puih hi kan theihna zawnah chuan kan inpeih reng; nimahsela kan puih duh ber sorkar hian pawisa a neih loh thu leh a mamawh thu hi Finance Minister kâ aṭangin kan la hre lo, pawisa tam zia hlir min hrilh zawk a ni," a ti a, pawisa tam ti chunga pawisa khawn anga sorkar a awm leh si chu mak a tih thu a sawi.