Kawng chhiat vangin vawiinah Lunglei dist-ah No Vehicles Day

Aizawl - Thenzawl - Lunglei (ATL) World Bank kawngpui a chhiat em avangin YMA Sub-Headquarters, Lunglei bultumin vawiin zing dar 6 aṭanga tlai dar 5 thleng Lunglei district-ah No Vehicles Day hman a ni dawn a, Lunglei district chhungah lirthei hmanga veivah phal a ni dawn lo.

Lunglei Sub-Hqrs. YMA hruaitute chuan tun hnaia thuthar thehdarhtute an kawm­naah, ATL kawng a chhiat em avangin chhim lam mipui an buai hle tih an sawi a, "Kawng hi chhim mipui tan kan nunna hnár, engkim kan châwk luhna a ni. Heti tak maia a chhia hi pawi kan ti tak zet. Tun dinhmunah hian lirthei chetsualna thlengin mihring nunna hialin a tuar ang tih a hlauhawm tak zet a ni," an ti.

An theih ang anga hma an lak thu sawiin Lunglei YMA hruaitute chuan, "June 2, 2022 khan Chief Minister hnenah lehkha thehlutin, a hma thei ang bera kawng min chei ṭhatsak turin kan ngen a, a ṭul a nih phawt chuan YMA pawh department puibàwm turin kan inhuam thu kan tarlang tel a ni," an ti a; July 27, 2022 khan PWD hotute kâwmin, a rang thei ang ber leh a ṭha thei ang bera kawng siam tura an ngen leh thu an sawi.

Lunglei Sub-Hqrs YMA hruaitute sawi danin, August 25, 2022 khan Lunglei district MLA-te léngah an sáwm a, High Powered Committee vice chairman Lawmawma Tochhawng chiah a kal a; PWD hotute nen ATL kawngpui chung­chang sawiho a ni.

August 29 zan khan Lunglei Circuit House-ah chhim bial MLA ṭhenkhat nen inkawmho leh a ni a, kawng siamtu Bhavya Construction hotute'n defect liability period (31.3.2023) ral hma ngeia a chhe lai an siam theih nana hma laksak turin an ngen. Chief Minister hnenah lehkha pek leh a ni a, lehkha copy chu chhim lam MLA-te pawh pek vek an ni.

Kawngpui siam tura hmalakna a beitham hle tih sawiin Lunglei YMA hruaitute chuan, "October 18, 2022 zing dar 6 aṭanga tlai dar 5 inkarah Lunglei district chhungah No Vehicles Day hman ni se tiin kan rél. Lunglei district mipuite'n kan châk lâkna kawngpui siam a nih thuai theih nana min ṭawiawm a, hemi ní chauh tal hi chu kan lirtheite tlân chhuahpui lo turin kan inngen a ni," an ti.

YMA Sub-Hqrs, Lunglei chuan, an hmalakna chu poli­tics-a hamṭhatna leh inbeihna atan hmang lo turin political party-te an ngen bawk.

No Vehicles Day hman a nih chhung hian Lunglei khawpui bakah, district dang aṭanga Lunglei district luh theihna hmunahte duty an indah dawn a ni.