Inthlan tibawlhhlawhtu pakhat chu Dahkham politics a ni - K Sapdanga
ZPM working president K Sapdanga chuan nimin khan an party pisaa inkhawmah thu sawiin, inthlan tibawlhhlawhtu pakhat chu dahkham politics a nih thu leh, inthlanah thang kam chíng an awm thu a sawi.
K Sapdanga chuan, inthlan dawnah thang kam chíng an awm thu sawiin, "Inthlan tibawlhhlawhtu pakhat chu dahkham politics hi a ni. Mi ṭhenkhat chuan politics hi gambling atan an hmang thiam em em a, eng party-ah mah an buai ve lo. Pawl hrang hrangah maktaduai tél an dahkham thluah ṭhin. Hetianga thang kam chíng zinga tam tak chu state páwn lam mi an ni," a ti.
Inthlana thang kam chíngte'n thang an kam thluah ṭhin avangin tu pawl pawh sorkar se, leiba ṭhìn tur an nei vek ṭhin tih sawiin Sapdanga chuan, "Contract, supply hna záwngin an inrulhtir ṭhin. Heng dahkham politics rulh nan hian mipui pek tur chhiah tihpun a ngai a, a tuartu chu mipui tho kan ni," a ti a; chutiang thil do rêm dan kawng awmchhun chu, vote hmanga thenfai a nih thu a sawi.
ZPM Working President chuan, thluaka sum lut hlauhawmzia kohhran lam aṭangin inzirtir a ni tawh a, mipui pawh an chiang thawkhat tawh tih sawiin, "Thuneihtute berin mipui sum an ît tlat si chuan páwn lam aṭanga khap beh a har khawp mai. Dodal dan awm chhun chu vote hmanga chawlhtir a ni deuh mai àwm e," a ti.
CBI leh Judiciary-te pawh thlamuanpui a har tih sawiin Sapdanga chuan, "Cheng vaibelchhe 9 thubuai chinfel tâk dante khan min tihṭhaih a, kan thla a muang zo ta meuh lo. Kan hmachhuan awm chhun chu vote thil tih theihna hi a ni ta ber mai," a ti a; vote hmang ṭangkai turin mipui a sáwm.
ZPM Working President chuan, kum 2023-a MLA inthlanpuiah Congress party leh ZPM party-te thawkho tur angin eng level-ah mah sawi a awm loh thu leh tumna pawh a awm loh thu a sawi a, "Hetiang hi a lo ri leh palh a nih pawhin, ṭhahnemngai fálte duhthusam mai a ni tih lo hrethiam turin mipui kan ngen a ni," a ti.
K Sapdanga chuan, ZPM policy 'Sustainable Development & Reform Policy' tiha a laimu 'Development leh reform' tih lai chu uar takin Congress party-te'n an puanzarpui char char nia sawiin, "A duang chhuaktute aiin nasa takin an sawi thiam zawk a, an President a fakawm zual a, a hote ṭhenkhatin an kamkhat phah ni àwmin kan hria a, mahse, mi dik a nih avangin sawi a ṭhulh phah lo," a ti a; MNF pawh tlàwmah la lo a, Congress party mite tih dan zui ve a, 'Sem policy' hnâwl turin a ngen a ni.